Read Библија, Константинов 1 Цареви 6 Bible Online

1 Цареви 6 - Библија, Константинов bible

1 Цареви 6

¹Во четири стотини и осумдесеттата година од излегувањето на Израелците од Египетската Земја, во четвртата година на своето царување над Израел, во месецот Зиф - тоа е вториот месец - Соломон почна да го гради Господовиот Дом.

²Храмот што Соломон Му го градеше на Господа беше долг шеесет лакти, широк дваесет, а висок триесет лакти.

³Тремот пред Светилиштето на Храмот беше дваесет лакти долг, спрема храмовата широчина, а десет лакти широк, спрема должината на Храмот.

⁴На Храмот направи прозорци, затворени со решетки.

⁵Покрај ѕидот на Храмот околу Светината и Светината над светините, соѕида приградба на катови, сè наоколу.

⁶Долниот кат беше пет лакти широк, а средниот шест, а третиот седум лакти, зашто засеците ги распореди од надворешната страна околу Храмот, за да не би требало да ги вградува во храмските ѕидови.

⁷Храмот е граден од камен што веќе во каменоломот беше изделкан, така што при градењето не се чуја ни чекан ни длето, ни некакво железно орудие.

⁸Влезот во долниот кат беше од десната страна на Храмот, а по завојни искачувалки се одеше до средниот кат, и од средниот на третиот.

⁹Така го изгради Храмот и го доврши; и го покри со кедрови греди и даски.

¹⁰И соѕида уште приградба околу целиот Храм; беше пет лакти висока, а врзана со Храмот со кедрови греди.

¹¹И Господовото слово му стигна на Соломона:

¹²”Тоа е Домот што го градиш: ако одиш според Моите наредби, ако ги исполнуваш Моите наредби и ако ги пазиш Моите заповеди, тогаш ќе го исполнам за тебе ветувањето што му го дадов на твојот татко Давид:

¹³Ќе престојувам меѓу Израелевите синови и нема да го оставам Мојот народ Израел.”

¹⁴И така Соломон го изгради Храмот и го доврши.

¹⁵И ги обложи одвнатре ѕидовите на Храмот со кедрови даски - од подот до покривот ги обложи со дрво одвнатре - а со чемпресови даски го обложи подот на Храмот.

¹⁶И направи преграда од дваесет лакти, од кедрови даски, од подот до покривот, и го оддели тој дел на Храмот за Светина над светините.

¹⁷А Светилиштето, дел на Храмот пред Светина над светините - имаше четириесет лакти.

¹⁸А врз кедровината внатре во Храмот беа врежани украси - плетеници од папки и цвеќиња; сè беше од кедровина, и никаде не се гледаше камен.

¹⁹Светината над светините ја уреди внатре во Храмот, за да го смести таму Ковчегот на Господовиот Завет.

²⁰Светината над светините беше дваесет лакти долга, дваесет лакти широка, а ја обложи со чисто злато. Направи и жртвеник од кедровина,

²¹пред Светината над светините, и го обложи со чисто злато.

²²И сиот Храм го обложи со злато, сиот Храм и сиот жртвеник, кој е пред Светината над светините, го обложи со злато.

²³Во Светината над светините направи два херувима од маслиново дрво. Беа високи десет лакти.

²⁴Едното крило на херувимот беше пет лакти, а второто крило во херувимот беше пет лакти; имаше десет лакти од едниот крај на крилата до другиот.

²⁵И другиот херувим беше десет лакти: еднаква мера и еднаков облик на обата херувима.

²⁶Височината на едниот херувим беше десет лакти, така и на вториот.

²⁷Ги смести херувимите сред внатрешната просторија; ги ширеа своите крила, така што крилото на едниот достигаше до едниот ѕид, а крилото на другиот достигаше до другиот ѕид; во средината на просторијата крилата им се допираа.

²⁸И херувимите ги обложи со злато.

²⁹По сите ѕидови на Храмот, внатре и однадвор, врежа ликови на херувими, со палми и со расцветани цветови,

³⁰со злато го покри и подот на Храмот одвнатре и однадвор.

³¹А за влез во Светината над светините направи двокрилна врата од маслиново дрво; довратниците со праг беа на пет агли.

³²Двете крила на вратата од маслиново дрво ги украси со херувими, палми и со расцветани цветови, и сите ги обложи со злато; со златни листиња ги облепи херувимите и палмите.

³³Така и за влезот во Светилиштето направи врата од маслиново дрво, со четириаглести довратници.

³⁴Двете крила на вратата беа од чемпресово дрво, и двете се отвораа на едната и на другата страна.

³⁵Врежа врз нив херуви, палми и расцветани цветови, и го обложи со злато сè што беше ископаничарено.

³⁶Потоа го изгради внатрешното предворје од три реда делкан камен и од еден ред делкани кедрови греди.

³⁷Основите на Господовиот Храм беа положени во четвртата година, во месецот Зиф;

³⁸а во единаесеттата година, во месецот Вул - тоа е осмиот месец - Храмот е довршен со сите делови и со сè што му припаѓаше. Го изгради за седум години.