Read Библија, Константинов 1 Летописи 12 Bible Online

1 Летописи 12 - Библија, Константинов bible

1 Летописи 12

¹Еве ги оние што дојдоа кај Давида во Сиклаг, додека уште се криеше од Саула синот Кисов, и кои беа меѓу јунаците помагачи во бојот;

²умееја да ракуваат со лакот и со десницата и со левицата, и знаеја да се служат со камења и со стрели. Од Сауловите браќа, Венијаминовците:

³началникот Ахиезер и Јоас, синови на Гаваецот Семај, па Езил и Фелет, синови Азмаветови, и Верах и Јуј Анатотец;

⁴Гаваонец Исмај, јунак меѓу триесетмината и над триесетмината, Еремиј, Јазаил, Јоанан и Јозавад Гедиротец;

⁵Елузај, Еримот, Валиј, Семариј и Сефатиј Аруфец;

⁶Елкана, Есиј, Азареил, Јоезер и Јасовеам, Кореовци;

⁷Јоил и Зевадиј, синови на Јероам Гедорец.

⁸Некои Гадовци преминаа кон Давида во тврдината во пустината, храбри јунаци, воини, вешти на бој, вооружени со штит и со копје; лицата им беа како лавски, а беа брзи како срни по горите:

⁹началникот Есер, втор Овадиј, трет Елијав;

¹⁰четврти Мисман, петти Еремиј,

¹¹шести Атај, седми Елил;

¹²осми Јоанан, деветти Елзавал,

¹³десетти Еремиј, единаесетти Мохванај.

¹⁴Тоа беа воени старешини од Гадовите синови, најмалиот над стотина, а најголемиот над илјада.

¹⁵Тоа се оние кои во првиот месец преминаа преку Јордан, кога се разлеа преку сите свои брегови, и кои ги растераа сите жители од длабоките долини на исток и на запад.

¹⁶Дојдоа и од Венијаминовите и од Јудините синови кај Давида во тврдината.

¹⁷Давид излезе пред нив и, откако проговори, им рече: „Ако доаѓате со мир кај мене за да ми помогнете, моето срце ќе се соедини со вашето; ако дојдовте за да ме предадете на моите непријатели, Бог на нашите татковци нека види и нека суди, зашто нема неправда врз моите раце!”

¹⁸Тогаш духот го опфати Амасај, началникот над триесетмината, и тој рече: „Тебе, Давиде! Со тебе, Јесеев сине, мир! Мир со тебе, мир со оној кој ти помага, зашто твој помошник е твојот Бог!” Така Давид ги прими и ги постави меѓу војводите над четите.

¹⁹Некои од Манасиевите синови преминаа кај Давида кога одеше со Филистејците во бој против Саула, но не им помогна, зашто филистејските кнезови, откако размислија добро, го отпуштија, велејќи: „Би можел да премине кај својот господар Саул, а тоа ќе нè чини главите.”

²⁰И така кога се враќаше во Сиклаг, преминаа кај него од Манасиевото племе: Адна, Јозавад, Едијаил, Михаил, Јозавад, Елиуј и Салтај, главатари илјадници во Манасиевото племе.

²¹Тие му помагаа на Давида против разбојничките чети, зашто сите беа храбри јунаци, та станаа заповедници во неговата војска.

²²Навистина одден наден доаѓаа кај Давида за да му помагаат, сè додека неговата војска не стана огромна како Божја војска.

²³Еве го бројот на луѓето вооружени за војна, кои дојдоа кај Давида во Хеврон за да го пренесат на него Сауловото царство, според Господовата повелба:

²⁴Јудини синови, кои носеа штит и копје, шест илјади и осум стотини вооружени за војна.

²⁵Од Симеоновите синови, храбри јунаци за војна, седум илјади и сто.

²⁶Од Левиевите синови четири илјади и шест стотини.

²⁷Така и Јодај, главатар на Ароновите потомци, и со него три илјади и седум стотини;

²⁸и младиот Садок, храбар јунак, и од неговиот род дваесет и два кнеза.

²⁹А од Венијаминовите синови, од Сауловите браќа, три илјади, зашто дотогаш најголемиот дел уште му остана верен на Сауловиот дом.

³⁰Ефремови синови дваесет илјади и осум стотини, сè храбри јунаци, луѓе на глас во своите семејства.

³¹Од половината Манасиево племе осумнаесет илјади спомнати по име, за да дојдат да го зацарат Давида.

³²Од Исахаровите синови, кои умееја да го разберат своето време и да сознаат што треба да направи Израел; двеста нивни главатари. Сите нивни браќа им беа подложени.

³³Од Завулоновите синови, способни за војна и вооружени за бој со секакво бојно оружје, педесет илјади, кои со смело срце се подредија во бојни редови.

³⁴Од Нефталимовото племе илјада кнезови и со нив триесет и седум илјади луѓе со штитови и со копја;

³⁵од Дановото племе дваесет и осум илјади и шест стотини вооружени за бој,

³⁶а од Асировото племе четириесет илјади способни за војска и за бој опремени.

³⁷Од оние отаде Јордан, од Рувимовото, од Гадовото и од половината Манасиево племе, сто и дваесет илјади луѓе со секакво воено оружје.

³⁸Сите тие војници, подредени во бојни редови, дојдоа со чесно срце во Хеврон за да го зацарат Давида над сиот Израел; и сите други Израелци беа еднодушни за да го постават Давида за цар.

³⁹Поминаа три дни со Давида, јадејќи и пиејќи. Браќата подготвија сè за нив.

⁴⁰Нивните најблиски соседи, сè до Исахар, Завулон и Нефталим, донесуваа храна на ослиците, на камилите и на мазгите, а со воловите јадења: брашно, смоквени низаници, суво грозје, вино, масло, крупен и ситен добиток изобилно, зашто беше веселба во Израел.