Read Библија, Константинов 1 Летописи 14 Bible Online

1 Летописи 14 - Библија, Константинов bible

1 Летописи 14

¹Тирскиот цар Хирам му испрати на Давида пратеништво и кедрови дрва, ѕидари и дрводелци за да му градат дворец.

²Тогаш Давид созна дека Господ го потврди за цар над Израел и дека го возвишил неговото царство заради Својот Израелски народ.

³Давид зеде уште жени во Ерусалим и имаше уште синови и ќерки.

⁴Еве ги имињата на децата што му се родија во Ерусалим: Самуј, Совав, Натан, Соломон,

⁵Евар, Елисуј, Елфалет,

⁶Нога, Нефег, Јафија,

⁷Елисам, Велијад и Елифалет.

⁸Кога Филистејците чуја дека го помазаа Давида за цар над сиот Израел, сите излегоа за да го бараат Давида. Откако го чу тоа, Давид излезе пред нив.

⁹Филистејците дојдоа и се раширија по Рафајската Долина.

¹⁰Тогаш Давид Го праша Бога: „Можам ли да ги нападнам Филистејците? Сакаш ли да ми ги предадеш мене во рацете?” Господ му одговори: „Нападни, зашто ќе ти ги предадам тебе во рацете!”

¹¹Тогаш тргнаа во Вал Ферасим, и Давид таму ги истепа. Давид рече: „Бог навлегува меѓу моите непријатели со мојата рака, како што навлегува водата.” Затоа она место беше наречено Вел Ферасим.

¹²Таму ги оставија своите богови; а Давид заповеда и ги изгореа во оган.

¹³Пак Филистејците се раширија по онаа долина.

¹⁴Давид пак Го праша Бога, а Бог му одговори: „Не оди по нив, туку опкружи ги и нападни врз нив од спротивната страна на Бекаим.

¹⁵Па кога ќе чуеш шум од чекори по Бекаимските Врвови, тогаш излези во бој, зашто тогаш Бог ќе оди пред тебе за да ја погуби филистејската војска.

¹⁶Давид направи како што му заповеда Бог; и ја поразија филистејската војска од Гаваон до Гезер.

¹⁷Давидовото име се прочу по сите земји, а Господ им влеа страв од него на сите народи.