Read Библија, Константинов 1 Летописи 22 Bible Online

1 Летописи 22 - Библија, Константинов bible

1 Летописи 22

¹Затоа Давид рече: „Ова е Домот на Господа и ова е жртвеник за паленици на Израел!”

²Давид заповеда да се соберат странците, кои беа во Израелската Земја и одреди каменоресци, за да делкаат прописно камења за изградбата на Божјиот Дом.

³Давид приготви многу железо за клинци на крилата на вратите и за рачките; и без мера многу бронза.

⁴Многу кедровина, зашто Сидонците и Тирците му довезуваа многу кедрови дрва на Давида.

⁵Зашто Давид мислеше: „Мојот син Соломон е млад и нежен, а Домот што треба да Му биде изграден на Господа треба да биде величествен, за слава и чест по сите земји. Ајде да му подготвам се.” И Давид подготви многу нешта пред својата смрт.

⁶Потоа го повика синот Соломон и му заповеда да Му изгради Дом на Господа, на Израелевиот Бог.

⁷Уште Давид му рече на Соломона: „Сине! Посакав во своето срце да Му изградам Дом на Името на Господа, својот Бог.

⁸Но ми дојде Господовото слово: „Многу крв пролеа и водеше големи војни; не ќе Му изградиш ти Дом на Моето Име; зашто пролеа многу крв на земјата пред Мене.

⁹Ете, ќе ти се роди син; тој ќе биде мирољубец, и ќе му дадам мир од сите негови непријатели отсекаде наоколу; името ќе му биде Соломон. Ќе му дадам мир и тишина на Израел во негово време.

¹⁰Тој ќе Му изгради Дом на Моето Име, тој ќе Ми биде син, а Јас ќе му бидам Татко нему, и ќе го утврдам неговиот царски престол над Израел довека.”

¹¹Сега, сине мој, Господ нека биде со тебе за да успееш за да Му изградиш Дом на Господа, својот Бог, како што рече за тебе.

¹²Само Господ нека ти даде разум и мудрост кога ќе те постави над Израел, затоа да го пазиш Законот на Господа, својот Бог!

¹³Ќе бидеш среќен ако ги вршиш внимателно одредбите и законите кои Господ му ги даде на Израел преку Мојсеја. Биди мажествен и храбар, не бој се и не плаши се!

¹⁴Еве, јас при мојата скудност подготвив за Господовиот Дом сто илјади златни таланти, и илјада илјади сребрени таланти, а бронза и железо без мера, зашто го има толку многу. Подготвив и дрва и камења, а и ти додај нешто кон тоа.

¹⁵Имаш многу добри работници, каменоресци, ѕидари, дрводелци и секакви вештаци во секое умеење;

¹⁶златото, среброто, бронзата и железото немаат мера; и така, оди и гради, и Господ нека биде со тебе!”

¹⁷Тогаш Давид им заповеда на сите израелски кнезови да му помагаат на неговиот син Соломон:

¹⁸”Не е ли со вас Господ, вашиот Бог, Кој ви даде мир отсекаде наоколу, зашто ги предаде во мои раце жителите на оваа земја, и земјата е покорена пред Господа и пред Неговиот народ.

¹⁹И така, сега дајте со своето срце и со својата душа да Го барате Господа, својот Бог; одете и градете Му Светилиште на Господа Бога, внесете го Ковчегот на Господовиот Завет и светите Божји посатки во Домот што ќе Му биде изграден на Господовото Име.”