Read Библија, Константинов 2 Летописи 11 Bible Online

2 Летописи 11 - Библија, Константинов bible

2 Летописи 11

¹Откако дојде во Ерусалим, Ровоам го собра сиот Јудин и Венијаминов дом, сто и осумдесет илјади одбрани војници, за да удрат на Израел и за да му го вратат царството на Ровоама.

²Но Господовото слово му дојде на Божјиот човек Семај:

³”Кажи му на Соломоновиот син Ровоам, јудејскиот цар, и на сите Израелци во Јудиното и Венијаминовото племе:

⁴’Господ вели вака: „Не одете да војувате со браќата! Нека секој се врати во својата куќа, зашто ова потекнува од Мене.”‘“ И тие го послушаа Господовото слово, се вратија, и не удрија на Јеровоам.

⁵Ровоам, престолувајќи во Ерусалим, почна да подига цврсти градови по Јудеја.

⁶Така ги изгради: Витлеем, Етам, Текуј,

⁷Вет-Сур, Сохот, Одолам,

⁸Гат, Мариса, Зиф,

⁹Адораим, Лахис, Азика,

¹⁰Сараја, Ејалон и Хеврон, тврди градови во Јудиното и во Венијаминовото племе.

¹¹Откако ги утврди градовите, им постави заповедници и довлече храна, масла и вина за чување;

¹²во секој одделен град стави штитови и копја, и ги утврди мошне силно. Така тој ги имаше Јудиното и Венијаминовото племе.

¹³Свештениците и левитите, кои беа по сиот Израел, пристапија кон него од сите краишта.

¹⁴Левитите ги оставија пасиштата и имотот та отидоа во Јудеја и во Ерусалим, зашто Јеровоам и неговите синови ги отфрлија за да не Му вршат свештеничка служба на Господа,

¹⁵а постави свештеници за себе на високи места, за јарците и за телињата што ги направи.

¹⁶По нив доаѓаа од сите израелски племиња во Ерусалим за да Му жртвуваат на Господа, на Бога на своите татковци, оние кои го бараа со срцето Господа, Израелевиот Бог.

¹⁷Така го утврдија Јудејското Царство и го охрабрија Соломоновиот син Ровоам за три години, зашто три години одеа по патот на Давид и Соломон.

¹⁸Ровоам си ги зеде за жени: Маелета, ќерката на Давидовиот син Еримот, и Авихаила, ќерката на Јесеевиот син Елијав,

¹⁹која му ги роди синовите: Еус, Самариј и Зама.

²⁰А по неа се ожени со Авесаломовата ќерка Маха, која му ги роди: Авиј, Атај, Зива и Селомит.

²¹Ровоам ја љубеше Авесаломовата ќерка Маха повеќе од сите свои жени и соложнички, иако зеде осумнаесет жени и шеесет соложници и ако му се родија дваесет и осум синови и шеесет ќерки.

²²И Ровоам го постави Махиниот син Авиј за главатар и за кнез над неговите браќа, зашто беше наумил да го постави за цар.

²³И, работејќи мудро, ги размести синовите по сите Јудејски и Венијаминови краишта, по сите тврди градови, давајќи им храна во изобилство и женејќи ги со многу жени.