Read Библија, Константинов 2 Летописи 17 Bible Online

2 Летописи 17 - Библија, Константинов bible

2 Летописи 17

¹Тогаш на неговото место се зацари син му Јосафат; тој ја покажа својата сила против Израел.

²Ја размести војската по сите утврдени јудејски градови и постави намесници по Јудејската Земја и по Ефремовите градови, кои ги беше зазел неговиот татко Аса.

³Господ беше со Јосафат, зашто одеше по правите патишта на својот татко Давид и не ги побара Вааламите.

⁴Го бараше Бога на своите татковци и одеше според Неговите заповеди не правејќи како Израелевите синови.

⁵Затоа Господ го зацврсти царството во неговата рака, па сите Јудејци му даваа данок на Јосафата, така што придоби големо богатство и слава.

⁶Неговото срце се охрабруваше на Господовите патишта, па ги отстрани уште и високите места и ашерите од Јудеја.

⁷Во третата година на царувањето ги испрати кнезовите Вен-Хаил, Овадиј, Захариј, Натанаил и Михеј за да учат по јудејските градови.

⁸И со нив левитите: Семај, Натаниј, Зевадиј, Асаил, Семирамот, Јонатан, Адониј, Товиј и Тов-Адониј; а со нив свештениците Елисам и Јорам.

⁹Поучуваа по Јудеја носејќи го со себе Свитокот на Господовиот Закон и ги обиколуваа сите јудејски градови, учејќи го народот.

¹⁰Господовиот страв ги опфати сите земни царства околу Јудеја, така што не смееја да завојуваат против Јосафат.

¹¹Некои Филистејци сами му донесуваа дарови и данок во сребреници, а Арабјаните му донесуваа ситен добиток: по седум илјади и седум стотини овни и седум илјади и седум стотини јарци.

¹²Така Јосафат напредуваше сè повеќе додека не стана многу голем. Изгради во Јудеја стражарници и градови - складишта.

¹³Имаше многу работи во јудејските градови, а храбри јунаци во Ерусалим.

¹⁴Еве го нивниот попис според семејствата: од Јудиното племе илјадниците: началникот Адна и со него триста илјади храбри јунаци;

¹⁵до него началникот Јоанан и со него двеста и осумдесет илјади;

¹⁶по него Зихриевиот син Амасиј, кој се стави подготвено во Господова служба, со двеста илјади храбри јунаци.

¹⁷Од Венијаминовото племе: храбриот јунак Елијад и со него двеста илјади луѓе вооружени со лак и со штит;

¹⁸по него Јозавед и со него сто и осумдесет илјади готови за бој.

¹⁹Тоа се оние кои му служеа на царот, не броејќи ги оние што царот ги имаше наместено во тврдите градови по сета Јудеја.