Read Библија, Константинов 2 Летописи 3 Bible Online

2 Летописи 3 - Библија, Константинов bible

2 Летописи 3

¹Тогаш Соломон почна да Му гради Дом на Господа во Ерусалим, на Моривската Гора, таму каде што неговиот татко Давид имаше предвид. Тоа е местото што го подготви Давид, гумното на Евусеецот Орнан.

²Соломон го почна градењето во вториот ден на вториот месец на четвртата година од своето владеење.

³Ова се основите што Соломон ги постави за градењето на Божјиот Дом: шеесет лакти во должина - по старата мерка на лактот - а во широчина дваесет лакти.

⁴Тремот, што беше пред Домот, имаше, по широчината на овој последниот, а во должина дваесет лакти, а висок беше сто и дваесет лакти. Го обложи внатре со чисто злато.

⁵Големата дворница ја обложи со кедри, што ги покри со чисто злато и изработи врз нив палми и цветни венци.

⁶Потоа ја украси дворницата со блескави бесцени камења; златото беше парваимско злато.

⁷Со него ја покри дворницата: гредите, праговите и крилата на вратите та изваја херувими по ѕидовите.

⁸Потоа ја создаде дворницата на Светината над светините. Беше, според храмската широчина, долга дваесет лакти и широка дваесет лакти, и ја обложи со шест стотини таланти чисто злато.

⁹За клинците даде на мерка педесет златни сикли. И горните соби ги обложи со злато.

¹⁰Во дворницата на Светината над светините направи два херувими, леано дело. И нив ги обложи со злато.

¹¹Крилата на херувимите беа долги дваесет лакти: едното крило од пет лакти го допираше храмскиот ѕид, а второто од пет лакти го допираше крилото на другиот херувим.

¹²Така и крилото на вториот херувим, од пет лакти, го допираше ѕидот на Домот. Другото крило, од пет лакти, се спојуваше со крилото на другиот херувим.

¹³Раширените крила на херувимите имаа дваесет лакти. Херувимите стоеја простум, со лицата свртени кон Домот.

¹⁴Направи завеса од љубичеста свилена ткаенина, од црвено сукно, од отворено-црвено сукно и од лесно платно, та врз нив извезе херувими.

¹⁵Пред Домот направи два столба долги триесет и пет лакти, а нивните главчиња на врвот по пет лакти.

¹⁶Во Девира тој сплете венци та ги постави на врвот на столбовите и направи сто калинки кои ги постави меѓу венците.

¹⁷Ги постави столбовите пред Храмот, едниот оддесно, другиот одлево, та го нарече Јахин оној оддесно, а Воас оној одлево.