Read Библија, Константинов 2 Летописи 8 Bible Online

2 Летописи 8 - Библија, Константинов bible

2 Летописи 8

¹А кога поминаа дваесет години, за колку време Соломон ги подигна Господовиот Дом и својот дворец,

²Соломон изгради градови, што му ги даде Хирам, и ги насели таму Израелевите синови.

³Потоа Соломон отиде против Совскиот Емат и го освои.

⁴Ги соѕида Тадмор и секакви места за складови во Емат.

⁵Ги изгради и Горниот Вет Орон и Долниот Вет Орон, тврди градови со ѕидови, со врати и со лостови;

⁶и Валат, и сите градови во кои што имаше складови, сите градови за воени коли и градовите за коњаниците, и сè што посака Соломон да гради во Ерусалим и во Ливан и по сета земја на своето царство.

⁷А на сите кои останаа: од Хетејците, Аморејците, Ферезејците, Евејците и Евусејците, кои не беа Израелци,

⁸на нивните синови кои останаа по нив во земјата и кои Израелците не ги сотреа - Соломон им наметна данок до денешниот ден.

⁹Соломон не ги претворуваше Израелевите синови во робови за работа, туку беа воини, заповедници на неговите штитоносци и заповедници на бојните коли и на коњицата.

¹⁰Беа главатари над управителите, кои ги имаше царот Соломон двеста и педесет, и управуваа со народот.

¹¹Соломон ја пресели и фараоновата ќерка од Давидовиот Град во домот што и го беше изградил, зашто мислеше: „Мојата жена не ќе живее во дворецот на израелскиот цар, зашто е свет откако во него дојде Господовиот Ковчег.”

¹²Тогаш Соломон почна да Му принесува на Господа паленици на Господовиот жртвеник, што го беше изградил пред тремот,

¹³и тоа колку што требаше од ден во ден да принесе по Мојсеевата заповед, во саботи, и на младите месечини, и на празниците трипати во годината, на празникот Бесквасни лебови, на празникот Седмици, и на празникот Сеници.

¹⁴Ги постави, според уредбата на таткото Давид, свештеничките редови според нивната служба, и левитските по нивните должности, да слават со песни и да служат пред свештениците, колку што треба од ден во ден, и вратарите според нивните редови на секоја врата, зашто таква беше заповедта на Божјиот човек Давид.

¹⁵Не отстапија од царевата повелба за свештениците и за левитите во ништо, ниту за сокровиштата.

¹⁶Така се сврши сета Соломонова работа од денот кога беше положена основата на Господовиот Дом, па додека не го заврши. Така беше довршен Господовиот Дом.

¹⁷Тогаш Соломон отиде во Есион-Гавер и во Елот на морскиот брег во Едомската Земја.

¹⁸А Хирам му испрати преку слугите бродови и морнари вешти на морето, та отидоа со Соломоновите слуги во Офир; зедоа оттаму четири стотини и педесет таланти злато и му ги донесоа на царот Соломон.