Read Библија, Константинов Излез (2 Moj.) 29 Bible Online

Излез (2 Moj.) 29 - Библија, Константинов bible

Излез (2 Moj.) 29

¹„Ова е обредот што ќе го извршиш врз нив, за да ги посветиш за Мои свештеници: земи еден јунец и два овна без недостатоци;

²потоа пресен леб, пресни колачиња замесени во масло и бесквасни кори намачкани со масло. Направи ги од чисто пченично брашно.

³Нареди ги во кошница и принеси ги во кошницата со јунецот и двата овна.”

⁴Доведи ги Арона и неговите синови до влезот во Шаторот на средбата и измиј ги во вода.

⁵Потоа земи ја облеката и облечи го Арона во кошула; стави ги врз неа наметката на наплеќникот, наплеќникот и врзградникот и препаши го преку ефодот.

⁶Сложи му ја капата на главата; на капата сложи го светиот венец.

⁷Потоа земи масло за помазание; излеј го врз неговата глава и помажи го.

⁸Тогаш доведи ги неговите синови; облечи ги во кошулите,

⁹препаши ги со појасите Арона и неговите синови и завиткај им ги капите. Свештенството нека им припаѓа според вечна одредба. Така посвети ги Арона и неговите синови!”

¹⁰„Потоа доведи јунец пред Шаторот на средбата, па Арон и неговите синови нека положат раце врз главата на јунецот.

¹¹Тогаш пред Господа, на влезот во Шаторот на средбата, заколи го јунецот.

¹²Земи ја крвта на јунецот и со твојот прст намачкај ги роговите на жртвеникот. Остатокот од крвта истури ја во подножјето на жртвеникот.

¹³Земи го сето мрсно околу дробот, мрежичката на црниот дроб и двата бубрега со мрсното околу нив, па изгори ги на жртвеникот.

¹⁴Месото од јунецот, неговата кожа и неговата нечистотија изгори ги во оган надвор од логорот. Тоа е жртва покајница за грев.”

¹⁵„Потоа земи еден овен, па Арон и неговите синови нека ги положат своите раце врз неговата глава.

¹⁶И заколи го овенот, собери му ја крвта и попрскај го со неа жртвеникот од сите страни.

¹⁷Потоа насечи го овенот на делови, измиј му ја внатрешноста и нозете и положи ги врз неговите други делови и врз главата.

¹⁸И тогаш изгори го целиот овен на жртвеникот. Тоа е жртва паленица во чест на Господа, пријатен мирис, огнена жртва.”

¹⁹„Тогаш земи го вториот овен, па Арон и неговите синови нека ги положат своите раце на главата на овенот.

²⁰Сега заколи го овенот; собери му ја крвта и намачкај ги: месестиот дел на десното Ароново уво, месестиот дел на увото на неговите синови, палецот на нивната десна рака па палецот на нивната десна нога. Со остатокот од крвта плисни го жртвеникот наоколу.

²¹Потоа земи ја крвта што остана на жртвеникот и маслото за помазание и попрскај ги Арона и неговата облека, и неговите синови и нивните облеки. Така ќе бидат посветени тој и неговата облека, неговите синови и нивните облеки.”

²²„Потоа земи еден овен со лој, со мрсна опашка, со лој околу дробот, мрежичката на црниот дроб, двата бубрега и мрсното околу нив; десната плешка - зашто е тоа овен принесен за свештеничко посветување -

²³потоа еден тркалест леб, еден колак со масло и една кора од кошницата на бесквасниот леб што е пред Господа.

²⁴Сето тоа сложи им го на рацете на Арона и на неговите синови и принеси жртва вртена пред Господа.

²⁵Тогаш земи ги од нивните раце и изгори ги на жртвеникот, над жртвата паленица, за пријатен мирис пред Господа. Тоа е палена жртва во чест на Господа.

²⁶Потоа земи ги градите на овенот принесен за Ароновото посветување и принеси ги како жртва вртена пред Господа. Тоа нека биде твој дел.

²⁷Посвети ги градите што беа принесени како вртена жртва и плешките што беа принесени како поткрената жртва од овенот принесен за посветување на Арона и на неговите синови.

²⁸Тоа нека им биде награда на Арона и на неговите синови од Израелците за сите времиња. Па тоа е наемот што Израелците ќе го даваат од своите помирителни жртви - наем што Му припаѓа на Господа.

²⁹Ароновите посветени облеки нека им припаднат на неговите синови по него, за да бидат во нив помазани и посветени.

³⁰Синот кој ќе стане свештеник место него, кога ќе влезе во Шаторот на средбата за да врши служба во Светилиштето, нека ги носи седум денови.”

³¹„Потоа земи го овенот за посветување и свари го неговото месо на посветено место.

³²Арон и неговите синови нека го јадат месото од тој овен и леб од кошницата на влезот во Шаторот на средбата.

³³Нека јадат од она што служи за нивно покривање на гревот, за да бидат посветени и свети. Ниту еден туѓинец нека не јаде од тоа, зашто е посветено.

³⁴Ако остане нешто од месото за свештеничко посветување или нешто од оној леб до наутро, изгори го на оган. Не смее да се изеде, зашто е посветено.”

³⁵„Направи им токму така на Арона и на неговите синови, како што ти наредив. Посветувај ги седум денови.

³⁶Секој ден принесувај по еден јунец како жртва покајница - за помирување. И принеси жртва покајница за помирување на олтарот, потоа помажи го, за да биде посветен.

³⁷Седум денови принесувај жртва помирница за жртвеникот и посветувај го. Така жртвеникот ќе стане пресвет, и сè што ќе се допре до жртвеникот ќе биде посветено.”

³⁸„А ова треба да го принесуваш на жртвеникот: две јагниња, годиначиња, секој ден без прекин.

³⁹Жртвувај едно јагне наутро, а другото жртвувај го навечер.

⁴⁰Принеси со првото јагне десетина од ефа бело брашно замесено со четвртина ин првоточно истолчено масло, и жртва изливница од четвртина ин вино.

⁴¹Другото јагне принеси го во примрак. Со него принеси жртва приносница со неговата жртва излевница како и наутро - за пријатен мирис, жртва палена во чест на Господа.

⁴²Тоа нека биде трајна жртва паленица од поколение до поколение - при влезот во Шаторот на средбата, пред Господа. Таму Јас ќе се среќавам со тебе за да ти зборувам.

⁴³Ќе се состанувам тука и со Израелците, и Мојата слава ќе ги посветува.

⁴⁴Јас ќе ги посветам Шаторот на средбата и жртвеникот; ќе ги посветам Арона и неговите синови, за да ми служат како свештеници.

⁴⁵Јас ќе престојувам меѓу Израелците и ќе им бидам нивни Бог.

⁴⁶Тогаш тие ќе познаат дека тоа Сум Јас, Господ нивниот Бог, Кој ги избави од Египетската Земја, за да пребивам среде нив - Јас, Господ, нивниот Бог.”