Read Библија, Константинов Излез (2 Moj.) 31 Bible Online

Излез (2 Moj.) 31 - Библија, Константинов bible

Излез (2 Moj.) 31

¹Господ му рече на Мојсеја:

²„Гледај, Јас го повикав по име Веселеила, Уриевиот син, од Оровото колено, од Јудиното племе.

³Го наполнив со Божји Дух, кој му даде умеење, разбирање и способност за секакви работи:

⁴да измислува нацрти за работи од злато, сребро и бронза;

⁵за режење на бесцени камења, за вметнување, за копаничарство во дрво и за секакви работи.

⁶Уште го определив Елијав, Ахисамаховиот син од Дановото племе; ги надарив со вештина сите способни луѓе, за да можат да направат сè што ти наредив:

⁷Шаторот на средбата, Ковчегот на Сведоштвото, врз него Очистилиштето и сиот намештај на Шаторот;

⁸столот и сиот негов прибор, чистиот светилник со сиот негов прибор;

⁹кадилниот жртвеник, жртвеникот за жртви паленици и неговиот прибор, потоа мијалникот и неговото подножје;

¹⁰облеки за службата, посветените облеки за свештеникот Арон и облеките за неговите синови, за нивната свештеничка служба;

¹¹па миро за помазание и благомирислив темјан за Светилиштето. Нека направат сè како што ти наредив.”

¹²Пак Господ му рече на Мојсеја:

¹³„Речи им на Израелците: ‘Моите саботи треба да ги пазите, зашто саботата е знак меѓу Мене и вас од поколение до поколение, за да бидете свесни дека Јас, Господ, ве посветувам.

¹⁴И така, држете ја саботата, зашто е таа света за вас. Кој ќе ја онечисти, нека биде погубен; кој ќе работи во неа каква и да е работа, нека биде отстранет од својот народ.

¹⁵Шест дена нека се вршат работите, ама седмиот ден нека биде ден на целосен одмор, посветен на Господа. Кој ќе обавува некаква работа во саботен ден, нека биде погубен.

¹⁶Затоа Израелците нека ја пазат саботата - празнувајќи ја од поколение до поколение - како вечен завет.

¹⁷Таа нека е знак, засекогаш, меѓу Мене и Израелците. Па Господ за шест дни ги создаде небото и земјата, а на седмиот ден прекрати да работи и се одмори.’”

¹⁸Кога Господ го сврши својот разговор со Мојсеја на Синајската Гора, му даде две плочи на Сведоштвото, камени плочи, напишани со Божјиот прст.