Read Библија, Константинов Излез (2 Moj.) 36 Bible Online

Излез (2 Moj.) 36 - Библија, Константинов bible

Излез (2 Moj.) 36

¹„Затоа Веселеил, Елијав и сите вештаци, кои Господ ги надари со вештина и способност да ги извршат искусно сите работи потребни за Светилиштето, нека ги направат како што Господ заповеда.”

²Тогаш Мојсеј ги повика Веселеил, Елијав и сите оние што Господ ги надари со вештина; сите кои ги поттикнуваше срцето да се зафатат со работата и да ја извршат.

³Тие ги презедоа од Мојсеја сите приноси кои ги донесоа Израелците за да се направат работите за изградбата на Светилиштето. Но бидејќи тие и натаму донесуваа приноси утро по утро,

⁴сите мајстори, кои го градеа Светилиштето, дојдоа - секој од работата на која работеше -

⁵и му рекоа на Мојсеја: „Народот донесува многу повеќе отколку што е потребно за изведување на работата, што Господ ни нареди да ја извршиме.”

⁶Затоа Мојсеј издаде повелба што ја разгласија низ логорот: „Повеќе ниеден маж ни жена нека не донесуваат никаков прилог за Светилиштето!” Така го запреа народот, па не донесуваше нови дарови.

⁷Што имаа, беше доста за да се сврши целото дело, и уште имаше отповеќе.

⁸И така најискусните луѓе меѓу трудбениците го направија Шаторот. Го направија од десет завеси од преден лен и од љубичесто, црвено и темноцрвено предено. Ликови на херувими беа извезани врз нив.

⁹Должината на секоја завеса изнесуваше дваесет и осум лакти, а широчината на секоја завеса четири лакти. Сите завеси беа со иста мерка.

¹⁰Пет завеси составија една со друга, а пет други завеси составија пак една со друга.

¹¹На работ на последната од завесите составени во едно, направија петелки од сина волна; истото го направија и на работ на последната завеса на вториот дел;

¹²направија педесет петелки на едното парче, а педесет петелки на работ на завесата на вториот дел. Петелките стоеја една спроти друга.

¹³Тогаш направија педесет златни куки и ги составија завесите со куките една со друга. Така Шаторот беше како една целина.

¹⁴Потоа за покривање на Шаторот: направија завеси од козина, ги направија единаесет.

¹⁵Должината на секоја завеса беше триесет лакти, а широчината четири лакти. Тие единаесет завеси беа со иста мерка.

¹⁶Составија пет завеси одделно, а шест други одделно.

¹⁷Направија педесет петелки на работ на завесата на едниот дел, а педесет петелки направија на работ на другиот дел.

¹⁸Направија и педесет куки од бронза за да го состават покривот заедно, така што да претставува една целина.

¹⁹Потоа направија покрив за Шаторот од направени црвени овновски кожи, а врз него друг, од јазовечки кожи.

²⁰Исправените нагоре даски за Шаторот ги изработија од багремово дрво.

²¹Должината на секоја даска беше десет лакти, а широчината лакот ипол.

²²Секоја даска имаше два клина еден спроти друг, за да ја држат исправена. Тоа го направија на секоја даска за Шаторот.

²³Даските за Шаторот ги направија вака: дваесет даски за јужната страна;

²⁴направија четириесет подножја од сребро под дваесет даски - две подножја под првата даска за нејзините два клина, и две подножја под секоја следна даска за нејзините два клина.

²⁵За втората, северната страна на Шаторот направија дваесет даски

²⁶и за нив четириесет подножја од сребро - две подножја под првата даска, а по две подножја под секоја идна даска.

²⁷Одназад на Шаторот, кон запад, направија шест даски.

²⁸Направија и две даски за аглите на Шаторот одназад.

²⁹Тие беа составени при дното, но при врвот се составуваа со едно колце. Така двете ги поставија за двата агла.

³⁰Имаше осум даски со нивните подножја од сребро; шеснаесет подножја, под секоја даска две.

³¹Направија лостови од багремово дрво: пет од нив за даските на едната страна на Шаторот,

³²а пак пет лостови за даските на другата страна на Шаторот, и пет лостови за даските на Шаторот одназад, кон запад.

³³Тогаш направија средишен лост што поминуваше низ средината на даските од крај до крај.

³⁴Ги опковаа даските со злато, а нивните колца, низ кои беа провлечени лостовите, ги направија од злато. И лостовите ги опковаа со злато.

³⁵Направија завеса од љубичесто, црвено и темноцрвено предено и од преден лен; ја направија со извезани херувими.

³⁶Направија за неа четири столбови од багремово дрво и ги опковаа со злато. Нивните куки беа од злато, а им одлеаја и четири подножја од сребро.

³⁷На влезот во Шаторот направија завеса од љубичесто, црвено и темноцрвено предено и препреден лен, исткаена уметнички,

³⁸и за неа пет столпчиња со нивните куки. Врвовите на столпчињата и нивните поврзувачи ги опковаа со злато, додека пет подножја им направија од бронза.