Read Библија, Константинов Излез (2 Moj.) 39 Bible Online

Излез (2 Moj.) 39 - Библија, Константинов bible

Излез (2 Moj.) 39

¹Од љубичестото, црвеното и темноцрвеното предено направија убаво изработено руво за служба во Светилиштето; направија света облека за Арона, како што Господ му нареди на Мојсеја.

²Наплеќникот го направија од злато, љубичесто, црвено и темноцрвено предено и од препреден лен.

³Исковаа златни плочки, а потоа ги исекоа на нишки, за да ги испреплетат уметнички во љубичестото, црвеното и темноцрвеното предено и во препредениот лен.

⁴За наплеќникот направија прекурамници што беа составени со него на своите два краја;

⁵ткаенината што стоеше на него, беше направена од злато, од љубичесто, црвено и темноцрвено предено и од препреден лен како и тој, и од едно парче со него како што Господ му нареди на Мојсеја.

⁶Камењата на ониксот ги опточија со раб од злато. Врз нив беа, како што се режат печатите, врезани имињата на Израелевите синови.

⁷Нив ги ставија на прекурамениците на наплеќникот, за да бидат спомен-камења на Израелевите синови, како што Господ му нареди на Мојсеја.

⁸И врзградникот го изработија со работата на вештаците како и наплеќникот: од злато, од љубичесто, црвено и темноцрвено предено и од препреден лен.

⁹Врзградникот го направија четириаглест, двоен; беше долг една педа, широк педа, а удвоен.

¹⁰Вметнаа во него четири реда бесцени камења. Првиот ред беше од сард, топаз и смарагд;

¹¹вториот ред од антракс, сафир и адамант;

¹²третиот ред од лигур, ахад и аматист;

¹³а четвртиот од кризолит, оникс и јаспис. Сето тоа беше обрабено со злато.

¹⁴На бесценетите камења беа имињата на Израелевите синови. На број беа дванаесет колку и нивните имиња. Беа врезани како и печати - секој камен со името на едно од дванаесетте племиња.

¹⁵За врзградникот направија веришки од чисто злато како засукани врвци.

¹⁶Потоа направија две златни рамки и две златни колца па ги прицврстија двете колца за двата горни агли на врзградникот.

¹⁷Сега ги заврзаа тука засуканите врвци од злато за двете колца што беа прицврстени за аглите на врзградникот.

¹⁸Другите два краја на засуканите врвци ги прицврстија за две рамки. Така ги поврзаа со прекурамениците на наплекниќот однапред.

¹⁹Потоа направија две златни колца па ги прицврстија за двата краја на врзградникот покрај внатрешниот раб, свртен кон наплеќникот.

²⁰Уште направија две златни колца па ги прицврстија за долниот, преден крај на прекурамениците на наплеќникот, крај местото каде се врзува, врз ткаенината на наплеќникот.

²¹Ги врзаа колцата на врзградникот со колцата на наплеќникот со сина врвца, така што врзградникот да стои над препашката на наплеќникот и да не може да се одвои од наплеќникот, како што и Господ му нареди на Мојсеја.

²²Направија и наметка за наплеќникот од љубичесто предено.

²³Во средината на наметката имаше прорез како отвор на оклоп, разрез опшиен наоколу, за да не се скине наметката.

²⁴На долниот раб на наметката направија калинки од љубичесто, црвено и темноцрвено предено и од препреден лен.

²⁵А направија и ѕвончиња од чисто злато, па ѕвончињата ги врзаа меѓу калинките; сè наоколу во долниот раб на наметката меѓу калинките:

²⁶ѕвонче па калинкин цвет, ѕвонче па калинкин цвет околу долниот раб на наметката за вршење на служба, како што Господ му нареди на Мојсеја.

²⁷Потоа од исткаен лен направија кошули за Арона и за неговите синови;

²⁸а направија и капа од лен и капчиња од лен; направија платнени гаќи од препреден лен.

²⁹И појасите беа од препреден лен и од љубичесто, црвено и темноцрвено предено, извезани, како што Господ му нареди на Мојсеја.

³⁰Направија и плоча, свет венец, од чисто злато, и врз неа врежан натпис како што се врезува на печатен прстен: „Посветен на Господа.”

³¹За неа приврзаа сина врвца, за да можат да ја врзат на врвот на капата, како што Господ му нареди на Мојсеја.

³²Така беа завршени сите работи на Шаторот на средбата. Израелците направија сè онака како што Господ му нареди на Мојсеја да направат.

³³Тогаш му ги донесоа на Мојсеја: Шаторот и сиот негов прибор: неговите куки, неговите даски, неговите лостови, неговите столбови и неговите подножја;

³⁴покрив од направени црвени овновски кожи, покрив од јазовечки кожи, завесата за засолнување;

³⁵Ковчегот на сведоштвото со неговите ластегарки и Очистилиштето;

³⁶столот и сиот негов прибор, принесените лебови,

³⁷светилникот од чисто злато со неговите светилки - светилки веќе ставени во ред - и сиот негов прибор - и масло за осветление;

³⁸златен жртвеник, миро за помазание, благомиризлив темјан и завесата за влезот во Шаторот;

³⁹жртвеник од бронза со бронзена решетка; неговите ластегарки и сиот негов прибор; мијалникот и неговата потпирка;

⁴⁰завесите за дворот; нивните столбови и нивните подножја; завесата за дворниот влез, неговите јажиња и нивните колчиња - сиот прибор за служба во Шаторот на средбата;

⁴¹убаво изработени облеки за служба во Светилиштето - света облека за свештеникот Арон и облеки за свештеничката служба на неговите синови.

⁴²Токму како што Господ му нареди на Мојсеја, така Израелците ја свршија целата работа.

⁴³Мојсеј ги прегледа сите работи и утврди дека ги довршиле: како што Господ нареди, така и ги направија. И Мојсеј ги благослови.