Read Библија, Константинов Излез (2 Moj.) 40 Bible Online

Излез (2 Moj.) 40 - Библија, Константинов bible

Излез (2 Moj.) 40

¹Господ му рече на Мојсеја:

²„Во првиот ден на првиот месец издигни го Шаторот на средбата.

³Таму стави го Ковчегот на сведоштвото, потоа засолни го Ковчегот со завеса.

⁴Потоа внеси го столот и нареди на него што му припаѓа; внеси го и светилникот и приготви му ги светилките.

⁵А златниот жртвеник за кадење стави го пред Ковчегот на сведоштвото. Потоа обеси ја завесата над влезот во Шаторот.

⁶Стави го жртвеникот за паленици пред влезот на Шаторот на средбата.

⁷Меѓу Шаторот на средбата и жртвеникот смести го мијалникот и тури вода во него.

⁸Наоколу направи двор и обеси завеса над дворниот влез.

⁹Потоа земи миро за помазание и помажи ги Шаторот и сè што е во него; посвети го и сиот негов прибор, и ќе станат свети.

¹⁰Потоа намачкај го жртвеникот за жртви паленици, и жртвеникот ќе стане пресвет.

¹¹Помажи го мијалникот со неговата потпирка: посвети го!

¹²Потоа доведи ги Арона и неговите синови при влезот на Шаторот на средбата и измиј ги со вода.

¹³Тогаш облечи го Арона во посветената облека, помажи го и посвети го за да Ми служи како свештеник.

¹⁴Доведи ги и неговите синови, облечи ги во кошулите

¹⁵и помажи ги, како што го помаза и нивниот татко, за да Ми служат како свештеници. Нивното помазание нека ги воведе во вечно свештенство, во сите нивни поколенија.”

¹⁶Мојсеј направи вака. Како што му заповеда Господ, сè и така направи.

¹⁷Во првиот ден на првиот месец на втората година, Шаторот беше подигнат.

¹⁸Мојсеј го намести Шаторот вака: ги размести неговите подножја, тогаш ги исправи нагоре неговите даски, потоа ги постави лостовите и подигна столбови.

¹⁹Потоа распростре покривало над Шаторот, а над него го стави покривот на Шаторот, како што Господ му нареди на Мојсеја.

²⁰Тогаш го зеде Сведоштвото и го положи во Ковчегот; ги провлече ластегарките на Ковчегот; потоа го намести Очистилиштето одозгора на Ковчегот.

²¹Потоа го внесе Ковчегот во Шаторот; ја обеси завесата за засолнување. Така го засолна Ковчегот на сведоштвото, како што Господ и му нареди на Мојсеја.

²²Потоа го положи столот во Шаторот на средбата, на северната страна на Шаторот, но надвор од завесата.

²³На него ги принесе лебовите пред Господа, како што Господ му нареди на Мојсеја.

²⁴Тогаш го смести светилникот во Шаторот на средбата спроти столот, на јужната страна на Шаторот.

²⁵И ги запали светилките пред Господа, како што Господ му нареди на Мојсеја.

²⁶Златниот жртвеник го смести во Шаторот на средбата, пред завесата.

²⁷Запали врз него благомиризлив темјан, како што Господ му нареди на Мојсеја.

²⁸Потоа ја закачи завесата на влезот во Шаторот.

²⁹При влезот во Шаторот на средбата, го намести жртвеникот за жртви паленици. Врз него принесе жртва паленица и лебен принос, како што Господ му нареди на Мојсеја.

³⁰Меѓу Шаторот на средбата и жртвеникот го смести мијалникот, па тури во него вода за миење.

³¹Мојсеј, Арон и неговите синови ги мијеа своите раце и своите нозе од него.

³²А ги миеја кога влегуваа во Шаторот на средбата и кога пристапуваа кон жртвеникот, како што Господ му нареди на Мојсеја.

³³Најпосле Мојсеј направи двор околу Шаторот и жртвеникот и обеси завеси на дворната врата. Така Мојсеј ја сврши работата.

³⁴А тогаш облак го прекри Шаторот на средбата и Господовата слава го исполни Шаторот.

³⁵Мојсеј не можеше да влезе во Шаторот на средбата заради облакот што стоеше на него и заради Господовата слава што го исполнуваше Шаторот.

³⁶За цело време на нивното патување, штом облакот ќе се кренеше од Шаторот, Израелците тргнуваа:

³⁷но ако облакот не се кренеше, ни тие не тргнуваа на пат сè до денот кога ќе се кренеше.

³⁸Зашто за целото време на нивното патување Господовиот облак стоеше дење над Шаторот, а ноќе се појавуваше во облакот оган, видлив за сиот Израелов дом.