Read Библија, Константинов Излез (2 Moj.) 6 Bible Online

Излез (2 Moj.) 6 - Библија, Константинов bible

Излез (2 Moj.) 6

¹Господ му рече на Мојсеја: „Скоро ќе видиш како ќе постапам Јас со фараонот! Под силна рака ќе ги пушти да заминат; под силна рака сам ќе ги истера од својата земја.”

²Уште Бог му рече на Мојсеја: „Јас Сум Господ.

³Им се јавував на Авраама, Исака и Јакова како Ел Шадај. Но не им се открив со Своето име - Господ.

⁴И склучив завет со нив дека ќе им ја дадам Ханаанската Земја, земјата во која живееја како придојденци.

⁵А сега, откако ги чув воздишките на Израелците, кои Египетците ги држат во ропство, си спомнав на Својот Завет.

⁶И така, кажи им на Израелците дека Јас Сум Господ; дека ќе ве избавам од теретот што ви го наметнаа Египетците. Ќе ве ослободам од ропството во кое ве држат; ќе ве избавам удирајќи силно и казнувајќи строго.

⁷Ќе ве земам за Свој народ, и ќе бидам ваш Бог. Тогаш ќе знаете дека Јас, Господ, вашиот Бог, ве избави од египетското угнетување.

⁸Ќе ве доведам во земјата за која се заколнав дека ќе им ја дадам на Авраама, Исака и Јакова, и ќе ви ја дадам во наследство, Јас, Господ.”

⁹Мојсеј им го кажуваше тоа на Израелците, ама не сакаа да го слушаат: духовите им беа заматени од тешкото ропство.

¹⁰Тогаш Господ му рече на Мојсеја:

¹¹„Оди и речи му на фараонот, египетскиот цар, да ги пушти Израелците од својата земја.”

¹²Мојсеј Му прозбори на Господа: „Кога Израелците не ме слушаа, како ќе ме сослуша, бавен во говорот, фараонот!”

¹³Ама Господ им говореше на Мојсеја и Арона и ги праќаше сега при Израелците, а сега при фараонот, египетскиот цар, да ги пушти Израелците од Египет.

¹⁴Ова се главите на нивните домови. Синови на Израелевиот првороденец Рувим: Енох и Фалуј, Асрон и Хармиј. Тоа се семејствата произлезени од Рувима.

¹⁵А Симеоновите синови: Јемуило, Јамин, Аод, Ахин, Сар и Саул, син на Хананка. Тоа се семејствата што потекнуваат од Симеона.

¹⁶Ова се имињата на Левиевите синови со нивното потомство: Гирсон, Каат и Мерариј. Леви живееше сто триесет и седум години.

¹⁷Гирсонови синови се: Ливниј и Семеј со своите семејства.

¹⁸Каатови синови се: Амрам, Исар, Хеврон и Озило. Каат живееше сто триесет и три години.

¹⁹Мерариеви синови се: Малиј и Мусиј. Тоа се Левиевите семејства со нивните потомци.

²⁰Амрам се ожени со својата тетка Јохаведа, која му ги роди Арона и Мојсеја. Амрам живееше сто триесет и седум години.

²¹Исарови синови беа: Кореј, Нафег и Зехриј.

²²А Озилови синови се: Мисаило, Елисафан и Сигриј.

²³Арон се ожени со Елисавета, ќерката Аминадавова, сестрата Насонова, која му ги роди: Надав, Авијуд, Елеазар и Итамара.

²⁴Корееви синови беа: Асир, Елкан и Авијасаф. Тоа се Кореевите потомци.

²⁵Ароновиот син Елеазар се ожени со една од Футиловите ќерки, која му го роди Финеса. Тоа се главатарите на Левиевите домови според нивните семејства.

²⁶Тоа се оној Мојсеј и Арон, на кои Господ им заповеда да ги изведат Израелците од Египет во нивните чети.

²⁷Тоа се оние истите, Мојсеј и Арон, кои му зборуваа на фараонот, на египетскиот цар, да ги пушти Израелците од Египет.

²⁸Во денот кога Господ зборуваше со Мојсеја во Египетската Земја, му рече:

²⁹„Јас Сум Господ. Извести го фараонот, египетскиот цар, за сè што ти реков.”

³⁰Мојсеј се правдаше пред Господа: „Јас сум бавен во говорот. Како ќе ме послуша фараонот!”