Read Библија, Константинов Јов 10 Bible Online

Јов 10 - Библија, Константинов bible

Јов 10

¹Штом на мојата душа животот и се смачи; нека потече слободно мојата тажачка, ќе зборувам со горчината на својата душа.

²Ќе Му речам на Бога: „Не ме осудувај!” Кажи ми зошто се препираш со мене?

³Па што имаш од тоа да ме угнетуваш, да го зафрлиш делото на Своите раце, да им помагаш на намерите на нечесните?

⁴Дали се во Тебе телесни очи? Зар Ти гледаш како што гледа човекот?

⁵Зар Твоите денови се како деновите на смртникот, а Твоите години како човечкиот век?

⁶Заради што ја истражуваш мојата вина, и сакаш да ги разоткриеш моите гревови,

⁷кога знаеш добро дека сум невин, дека не можам да и избегам на Твојата рака?

⁸Твоите раце ме обликуваа, ме создадоа совршено, зошто сега пак да ме сосипеш?

⁹Спомни си, ме создаде како глина и ќе ме вратиш повторно во прав.

¹⁰Не ме излеа ли мене како млеко, и направи да се потсирам како сирење?

¹¹Ме облече со кожа и месо, ме сплете со коски и жили.

¹²Со милост ми го подари животот, внимателно бдееше над мојот здив.

¹³Но во Своето срце го скри ова, знам дека тоа беше Твој наум:

¹⁴да внимаваш будно дали ќе згрешам и да не ми помине гревот без казна.

¹⁵Ако сум грешен, тогаш тешко мене, ако сум прав, главата не смеам да ја поткренам - полн со срам, напоен со несреќа!

¹⁶Ако се исправам, ме гониш како лав, ја испитуваш Својата сила на мене,

¹⁷нови оптужби подигаш против мене, пламнуваш со поголем гнев на мене и војни, едни по други, ме напаѓаат.

¹⁸Зошто ме извади од утробата? О зошто не умрев: не ќе ме видеа,

¹⁹ќе бев како и да не сум бил, од утробата би ме ставиле в гроб.

²⁰Дните на мојот живот се толку кратки! Остави ме да здивнам уште малку,

²¹пред да тргнам на пат без враќање, во земјата на темнината, земјата на смртната сенка,

²²во земјата на густата темнина и метеж, каде што светлината е слична на најцрната ноќ. „