Read Библија, Константинов Јов 13 Bible Online

Јов 13 - Библија, Константинов bible

Јов 13

¹„Јас го видов сè тоа со своите очи, чув со своите уши и разбрав.

²Сè што знаете вие тоа го знам и јас, во ништо не сум полош од вас.

³Затоа, треба да зборувам со Сèдржителот, да ја изложам својата причина пред Бога.

⁴Зашто, вие сте вистински ковачи на лагата и вие сте сите напразни лекари!

⁵Кога бисте знаеле да молчите, ќе ја покажевте својата мудрост!

⁶Сепак слушајте ги моите докази, чујте ја причината на моите усни.

⁷Зар заради Бога зборувате лаги и зар заради Него се тие измамливи зборови?

⁸Зар сакате пристрасно да Го браните Бога? Зар сакате да Му бидете застапници?

⁹Зар би било добро Тој да ве испита? Зар бисте Го измамиле како човек?

¹⁰Тој ќе ве изобличи со претешка казна, заради вашата потајна пристрасност.

¹¹Зар не ве плаши Неговото величество и зар не ве опфаќа ужас од Него?

¹²Вашите причини се пословици од пепел, вашата одбрана е одбрана од кал.

¹³Молкнете сега! Оставете ме да зборувам, па после нека ме снајде што му е мило.

¹⁴Зар своето тело да го кинам сам со забите? Зар да го упропастувам животот со својата рака?

¹⁵Тој може да ме убие: немам друга надеж, туку да ги оправдам своите патишта пред Него.

¹⁶И тоа е веќе залог за моето спасение, зашто лицемер не може да стапи пред Него.

¹⁷Послушајте ги внимателно моите зборови, нека навлезе беседата во вашите уши.

¹⁸Ете: јас приготвив расправа, зашто сум уверен во своето право.

¹⁹Кој сака да се суди со мене? Зашто ако молкнам, одма ќе издивнам.

²⁰Само две молби не ми скратувај, да не се кријам од Твоето лице,

²¹крени ја од мене Твојата тешка рака и не плаши ме со својот ужас.

²²Тогаш прашај ме, а јас ќе одговорам; или јас да прашам, Ти да одговараш.

²³Колку престапи и гревови направив? Покажи ми ги мојот прекршок и вината.

²⁴Зошто го криеш сега Своето лице од мене и зошто гледаш непријател во мене?

²⁵Зошто го изморуваш со страв листот гонет од ветер и зошто се нафрлаш врз суво сламче?

²⁶О, Ти, Кој ми пишуваш горчливи пресуди и ме теретиш со гревовите на младоста,

²⁷Кој ми ги стави нозете во клада, и Кој бдееше над секој мој чекор и ги испитуваш трагите на моите стапки!

²⁸Животот ми се распаѓа како гнило дрво, како облека што молците ја изедуваат.”