Read Библија, Константинов Јов 16 Bible Online

Јов 16 - Библија, Константинов bible

Јов 16

¹Тогаш Јов проговори и рече:

²„Колку се наслушав такви беседи, сите вие сте ми мачни тешители!

³Има ли крај на тие празни зборови? Што те осмелува да ми одговараш така?

⁴И јас би можел да зборувам како вас, да беше вашата душа на место на мојата; и јас би можел да ве затрупам со зборови и да мрднам со главата така над вашата судбина;

⁵и јас би можел да ве охрабрувам со устата, и не би го жалел трудот на своите усни.

⁶Но, ако говорам, страдањето не се ублажува, ако ли замолчам, зар ќе ме одмине?

⁷Сега злопакоста ме умори сосем, цела толпа се нафрли врз мене.

⁸Стана да сведочи против мене и во моето лице фрла клевети.

⁹Со својот гнев ме распарчува и гони, чкртајќи со забите се нафрла врз мене. Моите противници ме сечат со очите,

¹⁰заканувајќи се, ја отвораат устата против мене, ме удираат срамно по образите, тогаш сите, се нафрлуваат на мене.

¹¹Да, Бог ме предаде на неправедните, Тој ме фрли во рацете на опаките.

¹²Живеев мирно додека Тој не ме растресе, ме фати за вратот, за да ме скрши, ме зеде за Своја цел.

¹³Неговите стрели ме окружија, немилосрдно ми ги прободе бубрезите и со мојата жолчка ја натопи земјата.

¹⁴Отвора рана до рана на моето тело, како бесен војник напаѓа на мене.

¹⁵Го сошив голото тело во вреќиште, го нурнав своето чело во правта.

¹⁶Ми се запали целото лице од солзи, темна сенка падна преку моите веѓи.

¹⁷А нема насилство во моите раце, мојата молитва секогаш беше чиста.

¹⁸О земјо, немој да ја криеш мојата крв, и не оставај никаде да почине мојот крик.

¹⁹Отсега јас имам сведок на небото, мојот Бранител стои горе во висините.

²⁰Моите пријатели ме презираат, додека моите солзи се леат пред Бога.

²¹О да ме одбрани во мојот спор со Бога како што смртникот го брани својот ближен!

²²Но, на мојот живот му се доброени годините, ќе тргнам на пат без враќање.”