Read Библија, Константинов Јов 18 Bible Online

Јов 18 - Библија, Константинов bible

Јов 18

¹Тогаш Валдад од Шуах проговори и рече:

²Кога мислиш да ги зауздаш своите беседи? Вразуми се, сега, да разговараме!

³Зошто нè сметаш за неразумен добиток? Зар сме животни во твоите очи?

⁴О ти, што се раскинуваш себеси од гнев, сакаш ли да опустее земјата заради тебе, да се изместат карпите од своето место?

⁵Светлината на опакиот ќе угасне, и не ќе му свети пламен во огништето,

⁶ќе потемнее светлината во неговиот шатор и над него ќе згасне светилката.

⁷Неговите крепки чекори стануваат ограничени, тој се сопнува врз сопствените намери.

⁸Зашто неговите нозе го водат во стапица, и еве го како чекори веќе по мрежата.

⁹Тенка стапица му ја фати ногата, и ете, јажињата го стегнуваат цврсто.

¹⁰Го дебне јамка скриена на земјата, стапица го чека по патот по кој оди.

¹¹Стравови го напаѓаат отсекаде, и го прогонуваат по стапките.

¹²Гладот ја проголта сета негова сила, несреќата е секогаш до неговата слабина.

¹³Кобна болест му ја разјадува кожата, првенецот на смртта му ги нагризува деловите на телото.

¹⁴Го извлекуваат од неговиот шатор, да го одведат при владетелот на ужасите.

¹⁵Туѓинец се насели во неговиот стан, потуруваат оган врз неговиот дом.

¹⁶Одоздола се сушат неговите корења, а одозгора му се сушат сите гранки редум.

¹⁷Неговиот спомен ќе се сотре на земјата, неговото име се брише од лицето на земјата.

¹⁸Го тераат од светлина во темнина, сакаат да го изгонат од земниот круг.

¹⁹Во неговиот род ќе нема ни син ни внук, ниту преживеани во неговото живеалиште.

²⁰Потомците ќе се ужасуваат од неговиот ден и трепет ќе ги опфати современиците.

²¹Ете, таква судбина го снаоѓа беззаконикот и домот на оној, кој не Го познава Бога.”