Read Библија, Константинов Јов 22 Bible Online

Јов 22 - Библија, Константинов bible

Јов 22

¹Тогаш Теманецот Елифаз проговори и рече:

²„Зар човек може да Му биде полезен на Бога? Па кој е мудар, може да биде полезен на себеси.

³Зар е милост за Семоќниот ако си праведен, и зар има полза ако си непорочен?

⁴Или те кара заради твојата побожност и затоа сака да се суди со тебе?

⁵Не е ли тоа заради твојата преголема злоба и заради беззаконијата, на кои не им има број?

⁶Земаше залози од браќата за ништо, соблекуваше облеки од голи луѓе.

⁷Ти не го напои со вода жедниот, им го скратуваше лебот на гладните;

⁸на силниот човек ти му даваше земја, и угледниот се насели на неа.

⁹Ти ги пушташе вдовиците без ништо а сирачињата ги оставаше со празни раце.

¹⁰Ете, зашто те обиколуваат сега стапиците, зашто те измачуваат ненадејни стравови.

¹¹Светлината ти стана мрак, и ништо не гледаш, длабоки води те потопија тебе.

¹²Зар Бог не е во небесната висина и зар Тој не им го гледа темето на ѕвездите?

¹³Но ти велиш: „Што може Бог да знае? Зар може да суди низ темен облак?

¹⁴Облаците го засолнуваат неговиот поглед, и Тој оди по сводот на небесниот круг.”

¹⁵Имаш ли намера да се држиш до стариот пат, по кој одеа неправедните луѓе?

¹⁶Тие исчезнаа пред време, пороите им ги однесоа основите.

¹⁷Му зборуваа на Бога: „Остави нè нас! што може Сèдржителот да ни стори?”

¹⁸А Тој им го полнеше домот со блага, но советот на нечесните да биде далеку од мене.

¹⁹Праведниците гледаат и се радуваат непорочните им се потсмевнуваат:

²⁰„Ете, пропаднаа нашите противници, она што остана од нив, огнот им го проголта!”

²¹Спријатели се ти и смири се со Бога, и пак ќе ти биде вратено доброто.

²²Впрочем, прифати го законот од Неговата уста, посади го Неговото слово во своето срце.

²³Ако се вратиш покаен кон Семоќниот, ќе бидеш утврден наново; и ако ја отстраниш неправдата од својот шатор.

²⁴Тогаш ќе го отфрлиш златото во прав и офирското злато меѓу поточните камчиња.

²⁵Семоќниот ќе стане твое чисто злато, Тој ќе биде светливо сребро за тебе.

²⁶Да, Сèдржителот ќе биде твоја радост, и ќе го издигаш лицето кон Бога.

²⁷Ќе Му се молиш, и ќе те послуша, ќе ги исполниш своите ветувања.

²⁸Што и да преземеш, сè ќе ти успее, и светлина ќе ги осветлува твоите патишта.

²⁹Зашто, Тој ја понижува гордоста на гордите, додека им притекнува на помош на оние, што имаа смирени очи.

³⁰Тој го избавува невиниот од неволја, и тебе ќе те спаси чистотата на твоите раце.”