Read Библија, Константинов Јов 23 Bible Online

Јов 23 - Библија, Константинов bible

Јов 23

¹Јов проговори и рече:

²„Уште и сега е горчливо моето слово: моите страдања се потешки од моите воздишки.

³О, кога би знаел како да Го најдам, како да стигнам до Неговиот престол,

⁴пред Него би го изложил своето дело, од мојата уста би излегле доказите.

⁵Би сакал да знам што би ми одговорил и да го разберам словото што би ми го рекол!

⁶Зар Му треба голема сила за препирката? Не, достатно би било Тој да ме сослуша.

⁷Би видел праведен во противникот, и тогаш би се ослободил засекогаш од Судијата.

⁸Ако тргнам кон исток, не можам да Го најдам; ако тргнам кон запад, не Го согледувам.

⁹Барам на север, но не Го забележувам; невидлив е ако се завртам на југ.

¹⁰Па сепак, Тој добро го знае патот по кој чекорам! Нека ме испита: ќе излезам чист како злато!

¹¹Мојата нога се држеше до Неговите стапки, одев по Неговиот пат не застранувајќи.

¹²Не отстапувајте од заповедите на Неговите усни, ги чував словата на Неговата уста повеќе отколку секојдневната храна.

¹³Но ако посака нешто, кој ќе Го одврати? Што и да посака со душата, тоа ќе го исполни.

¹⁴Ќе го изврши тоа што ми го определи мене, како и сè друго што одлучил!

¹⁵Заради тоа, јас сум исплашен пред Него, и колку повеќе мислам, стравот ме фаќа посилно.

¹⁶Бог ми го раслаби срцето, Сèдржителот ме исплаши,

¹⁷иако не пропаднав ни во темнините, ниту во мракот што моето лице го покри.”