Read Библија, Константинов Јов 28 Bible Online

Јов 28 - Библија, Константинов bible

Јов 28

¹Да, среброто има свое наоѓалиште, а златото место каде се прочистува.

²Железната руда се вади од земјата, а од камена рудница се топи бакар.

³Луѓето и поставуваат граница на темнината и копаат до најголемите длабочини, по камен закопан во мрак.

⁴Далеку во туѓина длаби ровови, до кои не допира човечката нога, виси, нишајќи се, далеку од луѓето.

⁵Крилото на земјата, од кое ни никнува лебот, сето е раскопано како од оган.

⁶Нејзините карпи се сокровиште на сафир, златен прав се крие во нив.

⁷Грабливите птици не ги знаат тие патишта, соколовото око не ги забележува.

⁸Дивите ѕверови не стапнаа на нив, ниту пак некогаш лавот помина по нив.

⁹Но човек крева рака против каменот, и ги превртува планините од корен.

¹⁰Засечува премини низ камен, неговото око забележува сè скапоцено.

¹¹Тој го запира текот на водните жили; засолнати работи изнесува на видело.

¹²Но, од каде ни доаѓа Мудроста? Во кое место престојува Разумот?

¹³Човекот не знае нејзиниот цена, не ја открија во земјата на живите.

¹⁴Бездната зборува: „Ја нема во мене!” А морето: „Не се наоѓа кај мене!”

¹⁵Не може да биде купена со чисто злато, ниту да се измери со сребро нејзината цена.

¹⁶Не се мери таа со офирско злато, ни со скапиот оникс па ни со сафир.

¹⁷Не се споредува со злато, со кристал, ниту се дава за сад од чисто злато.

¹⁸Зошто да се спомнува кристалот, коралот, подобро е да стекне Мудрост отколку бисери.

¹⁹Што е спрема неа етиопскиот топаз, не се преценува ни со чисто злато.

²⁰Но, од каде ни доаѓа Мудроста? Во кое место престојува Разумот?

²¹Скриена е за очите на сите живи, таа им избегнува на небесните птици.

²²Пеколната пропаст и смртта изјавуваат: „Ние само чувме за нејзината слава.”

²³Единствено Господ го разбира нејзиниот пат, единствено Тој знае каде се наоѓа.

²⁴Зашто со поглед ги опфаќа границите на земјата и забележува сè под небесниот свод.

²⁵Кога сакаше да му одреди тежина на ветерот и со мерилка да ја измери сета вода,

²⁶кога му наметна закони на дождот и патишта на громовните облаци,

²⁷тогаш ја виде и ја измери, ја зацврсти и ја испита до дното.

²⁸А потоа му рече на човекот: „Стравот од Господа - ете што е мудрост, „Отстранувај се од злото” - тоа ти е разумност.”