Read Библија, Константинов Јов 32 Bible Online

Јов 32 - Библија, Константинов bible

Јов 32

¹Оние три човека прекратија да му одговараат на Јова, зашто тој се сметаше невин.

²Тогаш се налути Елиу, Варахиловиот син, од Вуза, од Арамовото племе: пламна со гнев против Јов, бидејќи се сметаше за праведен пред Бога.

³А пламна со гнев и против трите негови пријатели, зошто не најдоа веќе ништо што да му одговорат, па така го осудија Јова.

⁴Додека тие разговараа со Јова, Елиу молчеше, зашто тие беа постари од него.

⁵Ама кога виде дека оние три мажи немаа веќе одговор во устата, пламна со гнев.

⁶И проговорувајќи, Елиу, Варахиловиот син од Вуза рече: „Јас сум уште млад според своите години, а вие навлеговте во длабока старост; затоа јас се воздржав страшливо да го покажам своето знаење пред вас.

⁷Мислев во себе: „Староста ќе зборува, многуте години ќе ја покажат мудроста.”

⁸Навистина, има дух во човекот, здивот на Сèдржителот го прави разумен.

⁹Понапреднатата возраст не дава мудрост, ниту старците ја знаат праведноста.

¹⁰Затоа ве молам, послушајте ме мене, да ви го изложам и јас своето знаење.

¹¹Ги следев со внимание вашите беседи и ги сослушав вашите причини, додека баравте што да кажете.

¹²Целото мое внимание беше врз вас, но немаше никој да го побие Јова, ниту пак некој од вас да му се противстави на неговото слово.

¹³Не велете: „Ја најдовме мудроста, Бог ќе го побие, зашто човекот не може.”

¹⁴Тој не ја насочи беседата кон мене: нема да му одговорам со вашите зборови.

¹⁵Поразените не можат да се противстават, прекратија да зборуваат!

¹⁶Чекав! Но, ете, тие не зборуваат, молкнаа, ни збор повеќе да кажат,

¹⁷сега е на мене да проговорам, и јас ќе го изложам своето знаење.

¹⁸Многу зборови бликаат во мене, додека мојот дух ме тера одвнатре.

¹⁹Ете, мојата внатрешност е како затворено вино, ќе распукне како нов мев.

²⁰Да ми олесни, затоа ќе зборувам, ќе ги отворам усните и ќе ви одговорам вам.

²¹Не ќе се приклонам ниту кон едната страна, ниту имам намера да му ласкам некому,

²²јас не умеам да ласкам никако, зашто мојот Творец би ме погубил веднаш.”