Read Библија, Константинов Јов 33 Bible Online

Јов 33 - Библија, Константинов bible

Јов 33

¹„И така, чуј, Јове, што ќе ти кажам, наведни го увото кон моите беседи.

²Ете, ја отворив својата уста, а јазикот ми создава зборови под непцето.

³Моето срце ќе ти зборува искрено, усните ќе изречат чиста вистина.

⁴Па и мене Божјиот Дух ме создаде, здивот на Сèдржителот ме оживе:

⁵ако можеш, противстави ми се ти; подготви се да ми се спротивиш!

⁶Ете, како и ти, и јас сум пред Бога, како и ти, бев создаден од глина;

⁷затоа јас нема да те ужасувам со страв, мојата рака нема да те притисне.

⁸И така, на мои уши рече - сосем јасно ги чув твоите зборови:

⁹„Невин сум и без никаков грев; прав сум и нема вина врз мене,

¹⁰но Тој нашол обвинување против мене и ме смета за Свој непријател.

¹¹Ги стави моите нозе во клади, Тој внимава на секој мој чекор.”

¹²Тука, ти велам, не си во право, зашто човек не може да се мери со Бога.

¹³Па зошто се препираш со Него? Тој не дава отчет ниту за едно од Своите дела.

¹⁴Господ ни зборува нам еднаш и двапати, но човекот не обрнува внимание на тоа.

¹⁵Во соништата, во ноќните виденија, кога длабок сон ги совладува луѓето и додека сонуваат цврсто на леглата,

¹⁶тогаш Тој му зборува на увото на човекот, и го плаши со морничави привиди,

¹⁷за да го одврати од неговите дела, да ја обори гордоста во човекот,

¹⁸да ја спаси неговата душа од јамата и неговиот живот да не падне од меч.

¹⁹Тој го кара, на леглото, со болест, кога коските му се тресат непрекратно.

²⁰Кога лебот му се гади на неговиот живот и најдоброто јадење на неговата душа.

²¹Кога неговото тело гине очигледно и му се гледаат оголените коски.

²²Кога душата му се приближува до гробот, а неговиот живот кон гласниците на смртта.

²³Тогаш, ако не се најде ангел покрај него, еден посредник меѓу илјада, за да го спомени човекот на должноста,

²⁴па се сожали над него и рече: „Избави го, за да не слезе во јамата; најдов откупнина за неговиот живот!

²⁵Нека му процвета телото со младост, нека се врати во младечки денови!”

²⁶Му се помолува на Бога и Бог го послушува: Тој го погледнува радосно во лицето; му ја враќа на човекот неговата праведност.

²⁷Тогаш човекот ќе погледне на луѓето, велејќи: „Грешев и го изопачував правото, но Бог не ме казни.

²⁸Тој ми ја спаси душата од гроб и мојот живот се радува на светлината.”

²⁹Ете, Бог го прави сè тоа двапати и до трипати за човекот,

³⁰за да ја спаси неговата душа од гробот и да му го осветли животот со светлина.

³¹Внимавај, Јове, послушај ме добро; молчи, зашто уште не доискажав сè.

³²Ако имаш уште зборови, одговори ми, говори - со задоволство би те оправдал тебе,

³³ако немаш, послушај ме само, внимавај, и ќе те научам на мудрост.