Read Библија, Константинов Јов 34 Bible Online

Јов 34 - Библија, Константинов bible

Јов 34

¹Елиу ја продолжи својата беседа и рече:

²„И вие мудреци, чујте што ќе речам, вие, умни луѓе, послушајте ме мене,

³зашто нашите уши ги испитуваат беседите, исто како што непцето ја испитува храната.

⁴Заедно да испитаме што е право и заедно да размислиме што е добро.

⁵Јов тврдеше: „Јас сум праведен, но Бог ми ја скратува мене правдата.

⁶Во право сум, а ме прават лажец, прострелан на смрт, а без своја вина!”

⁷Зар има некаде човек како Јова, кој ја пие хулата како вода,

⁸кој чекори заедно со злочинците и го дели истиот пат со нечесните?

⁹Тој тврди: „Каква полза има човекот од тоа што сака да Му угоди на Бога?

¹⁰Затоа чујте ме, вие умни луѓе: Злото е многу далеку од Бога и неправедноста од Сèдржителот.

¹¹Па Тој му плаќа на човекот според делата секому му дава според неговото поведение.

¹²Навистина, Бог никогаш не прави зло, ниту Сèдржителот ја извртува некогаш правдата.

¹³Кој освен Него мисли за земјата? И кој ја управува вселената?

¹⁴Кога Тој би го повлекол Своето срце кон Себе, кога би го вратил сиот Свој Дух кон Себе,

¹⁵сите суштества би издивнале одеднаш и човекот би се претворил во прав.

¹⁶Ако имаш разум, слушај го ова, и внимавај на моите зборови.

¹⁷Може ли да владее оној кој ја мрази правдата? Сакаш ли да го осудиш Најправедниот?

¹⁸Оној, Кој му вели на царот: „Никаквец!” а на кнезот му говори: „Злосторнику!”

¹⁹Кој не е пристрасен кон кнезовите, и еднаков Му е бедниот и богатиот, зашто тие се дело на Неговите раце?

²⁰Умираат во еден миг: среде глува ноќ; народите се брануваат, поминуваат, моќните паѓаат без човечка рака.

²¹Зашто, Неговите очи се над човечките патишта, и Тој го гледа секој негов чекор.

²²Нема таков мрак и ниту смртна сенка, каде би можеле да се скријат оние што прават неправда.

²³Господ не му вели никому однапред, кога ќе стапи на суд пред Него.

²⁴Тој ги сотира јаките без сослушување и поставува други на нивното место.

²⁵И така, многу добро ги познава нивните дела! Среде ноќ, Тој ги кутнува и ги гази.

²⁶Со удар ги бие заради нивната злоба, во место каде сите можат да ги видат.

²⁷Зашто прекратија да одат по Него, ги занемарија Неговите патишта,

²⁸гонејќи ги бедните да пискаат до Него и угнетуваните да лелекаат кон Него.

²⁹Ама ако мирува, кој ќе Го трогне Него? Скрие ли го лицето, кој може да Го види?

³⁰Бдее над народите, како и над човекот, да не завладее некој кој го заведува народот.

³¹Кога безбожникот ќе Му рече на својот Бог: „Ме заведоа, повеќе не ќе грешам.

³²Не разбирам ли, поучи ме Ти сега и ако некогаш правев неправда, во иднина нема да ја вршам!”

³³Мислиш ли дека Бог треба да го казни него, додека ти ги презираш неговите замисли? Но кога одлучуваш ти а не јас, ајде сега, истреси ми ја својата мудрост!

³⁴Сите умни луѓе ќе се сложат со мене и секој разумен, кој ќе ме чуе мене:

³⁵„Јов зборуваше необмислено, нема мудрости во неговите зборови.

³⁶Затоа, Јов нека се испита до крај, зашто одговара како злосторник;

³⁷а на својот грев му додава уште побуна, тој плеска со дланките меѓу нас и ги натрупува своите хули против Бога.”