Read Библија, Константинов Јов 36 Bible Online

Јов 36 - Библија, Константинов bible

Јов 36

¹Елиу продолжи и рече:

²„Стрпи се, малку, па ќе те поучам, зашто уште не дореков сè за Бога.

³Своето знаење ќе го изнесам оддалеку, да Го оправдам својот Создавач.

⁴Навистина, моите зборови не знаат за лага, пред тебе е човек совршен во знаење.

⁵Ете, Бог е силен, но не презира, моќен е со силата на Својот разум.

⁶Тој не остава да живее нечесниот, им набавува правда на страдалниците.

⁷Тој не ги симнува очите од праведните, ги крева на престоли, покрај царевите, за да бидат возвишени довека.

⁸Ако се тие оковани во вериги и сопнати со јажињата на неволјата,

⁹Тој им ги напомнува нивните дела, им го кажува гревот на нивната гордост.

¹⁰Тогаш им го отвора увото за опомена и ги призовува да се отстранат од злото.

¹¹Ако послушаат и Му се покорат, нивните денови завршуваат во благопријатност, нивните години во радост;

¹²ако пак не слушаат, умираат од копје, заглавуваат, незнаејќи ни самите како.

¹³А нечесните срца негуваат омраза, не бараат помош, кога Тој ги врзува во окови;

¹⁴умираат во цветот на своето детство и животот им завршува меѓу содомците.

¹⁵Тој го спасува страдалникот преку неговата беда и му ги отвора очите во несреќа.

¹⁶Ќе те избави од грлото на теснината, ќе те изведе кон безграничните пространства, кон стол преполн со месо.

¹⁷Но ти си го исполнил судот на безбожниците суд и осудување ќе те постигне.

¹⁸Отсега нека не те заведува изобилството и нека не те расипе пребогатиот дар.

¹⁹Богатиот нека ти биде како човек без злато, а човекот со силна рака како слабиот.

²⁰Не ги гони оние што ти се туѓи, за да ги ставиш роднините на нивното место.

²¹Внимавај да не свртиш кон неправдата, зошто заради неа те најде искушението.

²²Ете, Бог е возвишен во Својата сила! Зар има учители како Него?

²³Кој Му Го одреди Нему Неговиот пат? Кој ќе Му рече: „Работеше криво?”

²⁴Спомни си да го величаш Неговото дело што луѓето го опеаја со песни:

²⁵Целиот свет го набљудува со восхитување, човекот се восхитува, макар оддалеку.

²⁶Бог е поголем отколку што можеме да сфатиме. неодолив е бројот на Неговите години!

²⁷Тој ги собира водните капки во височина и го претвора дождот во пареа и магла.

²⁸Тогаш поројни дождови плискаат од облаците и се изливаат врз луѓето.

²⁹Кој ќе го сфати ширењето на облаците, страшниот татнеж на Неговите шатори?

³⁰Ете, Тој ја распростира светлината над Себе и го покрива морското дно со води.

³¹Тој ги суди народите преку нив, ги дарува со изобилна храна.

³²Тој ја држи молњата со двете раце и и кажува каде да удри.

³³Со громов глас се навестува Себеси, стигнува со гнев да ја разгроми нечесноста.