Read Библија, Константинов Јов 37 Bible Online

Јов 37 - Библија, Константинов bible

Јов 37

¹Да, и моето срце трепери од тоа и сака да искочи од своето место.

²Слушнете го, слушнете го, грмежот на Неговиот глас, татнежот што излегува од Неговата уста.

³Ете, секавица лета преку целото небо - и светнува блесок од крај до крај на земјата. -

⁴Зад неа еден силен глас се разнесува: Тој грми со величествен глас. Неговите молњи летаат никој не им пречи, штом се чуе Неговиот глас.

⁵Да, Бог грми со величествен глас, создава несфатливи големи дела.

⁶Кога ќе му рече на снегот: „Опснежи по земјата!” И на поројните дождови: „Заврнете силно!”

⁷На секој човек му ги запечатува рацете, сите да го запознаат Неговото дело.

⁸Тогаш сите ѕверови се вовлекуваат во скривалиште и остануваат во своите легла.

⁹Бурата се крева од јужната страна, а северните ветрови донесуваат студ.

¹⁰Веќе од Божјиот здив настанува мраз и се здрвува водната површина.

¹¹И Тој пак ги полни со вода облаците, и облаците почнуваат да светкаат со молњи;

¹²кружат насекаде по Неговата волја, што им наложи, тоа ќе извршат, на лицето на целиот земски круг.

¹³Ги испраќа - или да ги казни народите, или за земјата или за милост.

¹⁴Послушај го ова, Јове, смири се и разгледај ги чудесните Божји дела.

¹⁵Знаеш ли како Бог ги заповеда нив, како ја пушта молњата од Својот облак? Тоа се чудеса на совршено знаење.

¹⁶Си научил ли како се издигат облаците и

¹⁷како се стоплуваат твоите облеки од жегата, во јужниот ветер, кога земјата се одмара?

¹⁸Зар ти ги распна небесата со Него, цврсти како одлеано огледало?

¹⁹Де, поучи ме што да Му речеме: не се снаоѓаме веќе заради темнината.

²⁰Зар ќе Му речеш: „Сакам да зборувам?” Или ќе се согласиш на сопствената пропаст?

²¹И така, кој може да гледа во светлината на небесата што свети со блесок, кога ветриштата ги растеруваат облаците?

²²Од север светнува како злато: Бог се облече со страшно величество!

²³Да, не можеме да Го достигнеме Сèдржителот, неизмерлив е во Својата сила и во судот, и во совршенството на правдата, Тој не угнетува никого.

²⁴Затоа сите луѓе нека се бојат од Него! На горделива мудрост Тој и не гледа.”