Read Библија, Константинов Јов 38 Bible Online

Јов 38 - Библија, Константинов bible

Јов 38

¹Тогаш Господ му одговори на Јова од бура и рече:

²Кој е тој кој со безумни зборови ја замрачува божествената промисла?

³Препаши си го крстот како јунак Јас ќе те прашам, а ти поучи Ме.

⁴Каде беше кога ја основав земјата, кажувај, ако знаеш!

⁵Знаеш ли кој и ги одреди мерките и кој го оптегна измерувачкото јаже над неа?

⁶На што и почиваат основите? Кој и постави крајаголен камен,

⁷додека воскликнуваа утринските ѕвезди и извикуваа Божјите дворјани?

⁸Кој го затвори морето со врати, кога заизвори од мајчиното крило,

⁹кога го облеков со облак како со облека и кога го завиткав со густа магла како со пелени;

¹⁰кога ја одредив неговата меѓа, ставив врати со лостови?

¹¹Дотаму, не подалеку, му реков нему, тука нека се крши гордоста на твоите бранови!”

¹²Зар некогаш си му заповедал на утрото? Зар си и го покажал на зората нејзиното место,

¹³да ја потфати земјата за рабовите и да ги истресе од неа сите безбожници,

¹⁴да ја претвори во печатна глина и да ја обои како некаква облека?

¹⁵Таа им ја одзема светлината на злосторниците и им ја крши кренатата тупаница.

¹⁶Зар си проникнал до морските извори? Зар си одел некогаш по дното на бездната?

¹⁷Зар ти ја покажаа вратата на смртта? Ги виде ли вратите на крајот на мртвите сенки?

¹⁸Ги согледа ли пространствата на земјата? Зборувај, доколку го знаеш сè тоа.

¹⁹Кои патишта водат во домот на светлината, на кое место престојуваат темнините,

²⁰за да ги одведеш во нивните краишта, за да им го покажеш патот кон нивниот стан?

²¹Ти го знаеш тоа, па ти се роди одамна, бројот на твоите денови е многу голем!

²²Дали си стигнал до ризниците на снегот и зар ги виде засолништата на градот,

²³што ги запазив за деновите на неволјата, за време на крвав бој и војна?

²⁴По кој пат се дели молњата, кога распрснува искри по целата земја?

²⁵Кој го ископа подводниот ров, кој му го исчисти патот на грмежот

²⁶за да врне дожд врз ненаселено подрачје, врз пустината каде нема жива душа,

²⁷за да ја напои неплодната пустина, за да никне трева во степата?

²⁸Има ли дождот свој родител? Кој е тој што ги раѓа капките на росата?

²⁹Од чие крило излегува мразот, кој ја создава сланата, што паѓа од небото?

³⁰Како се сцврстуваат водите како камен и како замрзнува површината на бездната?

³¹Можеш ли да ја врзеш Плејадата со вериги и да ги разврзеш врските на Орион,

³²да ја изведеш Деницата во вистинско време, да ја водиш Мечката со нејзините млади?

³³Зар ги познаваш ти небесните закони, па да им доделиш ним сила на земјата?

³⁴Можеш ли да им извикаш на облаците, па да те послушаат поројните дождови?

³⁵Зар по твоја заповед летаат секавиците и зар ти се одѕиваат тебе: „Еве нè?”

³⁶Кој ја положи мудроста во човекот, кој му даде разум на срцето?

³⁷Кој ги пребројува мудро облаците и кој ги излева небесните мевови,

³⁸додека земјата не се згусти во тесто и додека не се залепат нејзините грутки?

³⁹Зар ти ќе и уловиш лов на лавицата или ќе го задоволиш гладот на лавчињата,

⁴⁰додека чекаат гладно на своето легло и дебнат на жртвата од засолништето?

⁴¹Кој им набавува храна на гавраните кога неговите пилци пиштат кон Бога и летаат наоколу без храна?