Read Библија, Константинов Јов 40 Bible Online

Јов 40 - Библија, Константинов bible

Јов 40

¹И Господ му се обрна на Јова и му рече:

²Зар кудачот ќе се препира уште со Јакиот? Божјиот тужител нека одговори сам!”

³А Јов Му одговори на Господа и рече:

⁴”Премногу сум мал: што да одговорам? Со мојата рака ќе ја затворам устата.

⁵Реков збор - нема веќе да започнувам; реков два - ама нема да продолжам.”

⁶Тогаш Господ му одговори на Јова од бурата и рече:

⁷„Препаши го својот крст како јунак, Јас ќе те прашувам, а ти поучи Ме.

⁸Зар сакаш да го изгазиш и мојот суд, да Ме обвиниш, за да се оправдаш себеси?

⁹Зар твојата мишка ја има Божјата сила? Зар можеш да грмиш со гласот како Него?

¹⁰Наметни се со сјај и величество, облечи се со достоинство и слава.

¹¹Избувни со гнев на жесток оган, понизи го гордиот со еден поглед.

¹²Погледај го горделивецот, скрши го, сотри го наместо, секој злосторник.

¹³Закопај ги сите нив, заедно, во земјата, затвори ги во мрачна темница.

¹⁴Тогаш и Јас ќе ти дадам пофалба дека се ослободи со својата десница.

¹⁵А сега, ете, разгледај го нилскиот коњ, се храни со трева како добиток,

¹⁶ете, неговата сила е во бедрата, а јакоста му е во мишката на мевот.

¹⁷Ја здрвува кренатата опашка како кедар, жилите му ги испреплетија сите бедра.

¹⁸Неговите коски се железни цевки, неговите зглобови се глуждови од железо.

¹⁹Тој е првенец на Божјото создавање, Творецот го вооружи со меч.

²⁰Планините му донесуваат данок во храна, и сите ѕверови што играат по нив.

²¹Тој почива навален под лотосот, мочуришните трски и калта го кријат.

²²Лотосовите лисја му прават сенка, тој се лади под поточните врби.

²³Ако надојде реката, тој не се плаши: воопшто него не би го загрижило и целиот Јордан да затече во неговата уста.

²⁴Кој може да го фати за очите и кој може да му го прободе носот со стрела?