Read Библија, Константинов Јов 42 Bible Online

Јов 42 - Библија, Константинов bible

Јов 42

¹А Јов му одговори вака на Господа:

²„Јас знам, Твојата моќ е безгранична: Што и ќе наумиш, можеш да го направиш тоа.

³Кој е тој што со безумни зборови ја помрачува божествената промисла? Затоа зборував, но не разбирав, за чудесата што мене ми се несфатливи.

⁴О послушај ме, остави ме да зборувам: Јас ќе Те прашувам, а Ти поучи ме.

⁵Досега Те познавав само по слушање, но сега моите очи Те видоа.

⁶Затоа, се гнасам од сите свои зборови и се каам во прав и пепел.”

⁷Кога Господ му ги изговори на Јова овие зборови, Тој му рече на Теманецот Елифаз: „Ти и твоите два пријатели го распаливте Мојот гнев, зашто не зборувавте за Мене така право, како Мојот слуга Јов,

⁸Затоа, земете сега седум јунчиња и седум овни и отидете при Мојот слуга Јов, да принесете паленица за себе, а Мојот слуга Јов ќе се помоли за вас. Ќе имам обѕир кон него, и нема да ви сторам ништо лошо, зашто не зборувавте за Мене онака право, како Мојот слуга Јов.”

⁹Тогаш отидоа Елифаз од Теман, Валдад од Сава и Софар од Наам и направија како што им заповеда Господ. И Господ погледна кон Јова.

¹⁰И Господ го врати Јова во поранешната состојба, зашто се застапи за своите пријатели, па му го удвои она што го имаше.

¹¹Тогаш му се вратија на Јова сите негови браќа и сите негови сестри, и сите поранешни познати, па јадеа леб со него, во неговата куќа, жалејќи го и утешувајќи го заради сите неволји што Господ ги испрати на него. Секој му подари по еден сребреник и по еден златен прстен.

¹²Господ ја благослови новата Јовова состојба уште повеќе отколку поранешната. Стадата му броеја четиринаесет илјади овци, шест илјади камили, илјада двојки волови и илјада ослици.

¹³Имаше седум синови и три ќерки.

¹⁴На првата и го даде името Емима, на втората Касија, а на третата Керен-Апух.

¹⁵Во целиот тој крај немаше жени толку убави како Јововите ќерки. И таткото им даде еднакво наследство како и на нивните браќа.

¹⁶После тоа Јов доживеа сто и четириесет години и ги виде своите деца и децата на своите деца до четвртото поколение.

¹⁷Потоа Јов умре, стар, и сит од животот.