Read Библија, Константинов Јов 6 Bible Online

Јов 6 - Библија, Константинов bible

Јов 6

¹А Јов одговори и рече:

²„О кога би можела да се измери мојата мака, а мојата неволја да се стави на мерилка!

³Тие сега би биле потешки од морскиот песок; и затоа моите зборови се брзоплети.

⁴Стрелите на Сèсилниот се во моите внатрешности, нивниот бес ми го испива духот, Божјите стравотии удрија против мене.

⁵Па, рика ли дивото осле покрај свежа трева? Или мука ли волот покрај својата храна?

⁶Зар се јаде блутава храна без сол? Или има ли сласт во белката на јајцето?

⁷Ама она од што душата ми се одвраќаше, тоа ми стана одвратно јадење.

⁸Се надевам дека мојата молба ќе биде послушана, Бог да ми го исполни она за кое што копнеам!

⁹О, кога Бог би сакал да ме уништи, кога би мавнал со раката да ме сотре!

¹⁰Тоа би била вистинска утеха за мене, би можел да воскликнувам во тешки маки, зашто јас нема да ги скријам зборовите на Светиот.

¹¹Зар имам сила уште да чекам? И каков ми е крајот за да живеам подолго?

¹²Зар е мојата сила како силата на каменот? Зар е моето тело од бакар?

¹³На што можам да се потпрам во себе? Зар не ми е скратена секоја помош?

¹⁴Кој му одбива милост на својот ближен, го презрел стравот од Сèсилниот Бог.

¹⁵Браќата ме изневерија како поток, како зимските буици - своето корито,

¹⁶од мразот им се накреваат матните води, бујно растат од снегот што почна да се топи;

¹⁷но во сушно време скоро пресушуваат, тогаш од жега испаруваат, од коритото.

¹⁸Се отстрануваат тие од своите патишта, пристигаат во пустината и се изгубуваат во неа.

¹⁹Темските карвани ги бараат со очи, патниците од Шеба се надеваа на нив.

²⁰А кога ќе дојдат до нив, се наоѓаат во чудо, зашто се засрамија во својата надеж.

²¹Во овој час и вие сте ми такви: Видовте ужас и се исплашивте.

²²Дали ви реков: „Подарете ми нешто, дарувајте ми нешто од својот имот;

²³избавете ме од непријателска рака, ослободете ме од силниковото ропство?”

²⁴Поучете ме вие и ќе молкнам, покажете ми: во што е мојот престап.

²⁵О колку се силни искрените беседи! Но што имаат во предвид вашите прекори?

²⁶Можеби мислите да ги изобличите зборовите? Па, во ветер оди очајниковиот говор!

²⁷Зар бисте фрлиле жрепка за сирачето и бисте тргувале со својот пријател?

²⁸Погледајте ме сега добро во очите, внимавајте да не ве излажам во лице.

²⁹Проверете дали е неправда! Проверете го зборот, јас сум правичен!

³⁰Зар има неправда на мојот јазик? Зар не ја вкусив секоја несреќа?”