Read Библија, Константинов Псалми 118 Bible Online

Псалми 118 - Библија, Константинов bible

Псалми 118

¹Алилуја! Благодарете Му на Господа, зашто е благ, зашто е вечна Неговата милост!

²Нека рече Израелевиот дом: „Вечна е Неговата милост!”

³Нека рече Ароновиот дом: „Вечна е Неговата милост!”

⁴Нека речат сите што се бојат од Господа: „Вечна е Неговата милост!”

⁵Го повикав Господа во тешкотија: Господ ме услиши и ме ослободи.

⁶Господ е со мене и јас не се плашам: што може да ми направи човек?

⁷Господ е со мене, помеѓу моите помошници, затоа гледам радосно на оние кои ме мразат.

⁸Подобро е да се надева некој на Господа, отколку да се надева на човек;

⁹подобро е некој да се надева на Господа, отколку да се надева на кнезовите.

¹⁰Сите народи ме опкружија, ги истребив во Господовото име.

¹¹Ме опкружија отсекаде; ги истребив во Господовото име.

¹²Ме опкружија како пчели, нивното боцкање жеже како запалени трња: ги истребив со Господовото име.

¹³Ме туркаа, силно за да паднам, но Господ ми помогна.

¹⁴Господ е моја сила и песна, Тој ми е спасител.

¹⁵Чуј! Радост и спасение се слуша во шаторите на праведниците; Господовата десница се прослави,

¹⁶Господовата десница ме издигна, Господовата десница се прослави!

¹⁷Не, нема да умрам, туќу ќе живеам и ќе ги кажувам Господовите дела.

¹⁸Господ ме казни со тешка казна, но не ме предаде на смрт.

¹⁹Отворете ми ги ширум вратите на правдата, ќе влезам, ќе Му благодарам на Господа!

²⁰Ова се Господовите врати, праведниците влегуваат низ нив!

²¹Ќе Ти благодарам што ме послуша и стана мој спасител.

²²Каменот што го отфрлија ѕидарите, стана крајаголен камен.

²³Тоа е од Господа и прекрасно е во нашите очи!

²⁴Ова е денот што Господ Го направи да Му воскликнуваме и да Му се радуваме Нему!

²⁵О Господи, дај ни спасение! Господи дај ни среќа!

²⁶Благословен, кој доаѓа во Господово име, ве благословуваме од Господовиот дом.

²⁷Господ е Бог, Тој ни дава светлина; врзете ја жртвата со јаже за роговите на жртвеникот.

²⁸Ти си мој Бог - Тебе Ти благодарам: Боже мој - јас Те возвишувам Тебе.

²⁹Благодарете Му на Господа, зашто е благ зашто е вечна Неговата милост!