Read Библија, Константинов Псалми 119 Bible Online

Псалми 119 - Библија, Константинов bible

Псалми 119

¹АЛЕФ. Блаженство на оние, кои го пазат Неговиот Закон. Блажени се чиј пат е непорочен, кои одат според Господовиот Закон!

²Блажени кои: ги чуваат Неговите сведоштва, Го бараат со целото срце.

³Кои не прават беззаконие, туку одат по Неговите патишта.

⁴Ги даде Своите прописи, за да бидат пазени грижливо.

⁵О, кога би биле цврсти моите патишта, за да ги чувам Твоите правила!

⁶Не ќе се засрамам тогаш, кога ќе внимавам на сите Твои заповеди.

⁷Ќе Те славам во чесноста на срцето, кога ќе ги научам пресудите на Твојата правда.

⁸Ќе ги чувам Твоите повелби: не ме оставај никогаш!

⁹БЕТ. Како ќе го запази младиот човек чист својот пат? чувајќи ги Твоите зборови.

¹⁰Те барам Тебе со целото свое срце; не оставај да скршнам настрана од Твоите заповеди.

¹¹Во срцето го запазив Твојот збор, за да не згрешам против Тебе.

¹²Благословен си, о Господи, научи ме на Своите повелби.

¹³Со своите усни ги навестувам, сите судови на Твојата уста.

¹⁴Се радувам на патот на Твоите прописи, повеќе отколку на сето богатство.

¹⁵Ќе размислувам за Твоите повелби и ќе ги разгледувам Твоите заповеди.

¹⁶Ќе се насладувам во Твоите правила, не ќе ги заборавам Твоите слова.

¹⁷ГИМЕЛ. Биди милостив кон мене, кон Твојот слуга, за да живеам и да ги чувам Твоите зборови.

¹⁸Отвори ги моите очи, за да ги гледам убавините на Твојот Закон!

¹⁹Јас сум придојденик на земјата, не ги криј од мене Твоите заповеди!

²⁰Душата ми се истоштува во секое време, копнеејќи за Твоите одлуки.

²¹Ти им се закани на гордите, проклети да се оние, што отстапуваат од Твоите заповеди.

²²Оддалечи ги од мене: презрението и срамот, зашто јас ги чувам Твоите сведоштва.

²³Кнезовите се состануваат и зборуваат против мене, Твојот слуга ќе размислува за Твоите заповеди.

²⁴Зашто Твоите сведоштва се моја наслада, Твоите повелби се мои советници.

²⁵ДАЛЕТ. Мојата душа лежи во прав: врати ми го животот според Твојот збор.

²⁶Ти ги кажував сите свои патишта и Ти ме чу: ме научи на Твоите заповеди.

²⁷Покажи ми го патот со Твоите правила и ќе размислувам за Твоите чудеса.

²⁸Мојата душа рони солзи од тага, подигни ме според Твојот збор!

²⁹Држи ме далеку од патот на заблудата и надари ме милостиво со Твојот Закон.

³⁰Јас го одбрав патот на вистината, пред очите ги ставив Твоите одлуки.

³¹Јас цврсто се прилепив до Твоите прописи, о Господи, немој да ме посрамуваш!

³²Јас чекорам по патот на Твоите заповеди, зашто Ти ми го осветли срцето.

³³ХЕ. Покажи ми ја Господи, врвицата на Твоите правила и јас ќе ја чувам до крај.

³⁴Научи ме да се придржувам кон Твојот Закон и ќе го чувам со сето срце.

³⁵Упати ме по патеката на Твоите заповеди, зашто јас се насладувам во неа.

³⁶Приклони ми го срцето кон Твоите прописи, а не кон среброљубие!

³⁷Одврати ги моите очи да не ја гледаат суетата, чувај ми го животот на Твојот пат!

³⁸Исполни ги ветувањата на Твојот слуга, што им ги даде на оние кои се бојат од Тебе!

³⁹Отстрани го срамот, од кој се плашам, зашто се благи Твоите пресуди.

⁴⁰Еве, копнеам по Твоите наредби: поживи ме со Твојата правда.

⁴¹ВАВ. О, Господи, нека Твојата милост дојде врз мене, и Твоето спасение според Твоето ветување.

⁴²Ќе им одговорам на оние што ме исмеваат, зашто се надевам на Твоето слово.

⁴³Не одземај го зборот на вистината од мојата уста, зашто се надевам на Твоите судови.

⁴⁴Ќе го пазам Твојот Закон постојано и довека.

⁴⁵Ќе одам нашироко, зашто ги истражувам Твоите повелби.

⁴⁶Ќе зборувам за Твоите прописи пред царевите и нема да се збунам.

⁴⁷Мојата наслада е во Твоите заповеди, зашто ги љубам.

⁴⁸Јас ги подигам рацете кон Твоите заповеди, зашто ги љубам и размислувам за Твоите повелби.

⁴⁹ЗАИН. Спомни си за Твоето слово кон Твојот слуга, со кое ми даде надеж.

⁵⁰Во неволја Твојот збор ми е сета утеха, тој ми е живот.

⁵¹Гордите ме напаѓаат жестоко; но јас не отстапувам од Твојот Закон.

⁵²Се сеќавам, о Господи, за Твоите дамнешни пресуди и тоа ме утешува.

⁵³Гнев ме опфаќа заради грешниците, што го напуштаат Твојот Закон!

⁵⁴Твоите повелби ми се песна, во земјата низ која патувам.

⁵⁵Ноќе си спомнувам, Господи, за Твоето име, и го чувам Твојот Закон.

⁵⁶Еве што е мојата желба: да ги чувам Твоите повелби.

⁵⁷ХЕТ. Мој дел е, Господ - реков - да ги пазам Твоите зборови.

⁵⁸Го барав Твоето лице со сето мое срце, помилувај ме според Твоето слово.

⁵⁹Размислував за своите патишта и ги насочив нозете кон Твоите сведоштва.

⁶⁰Побрзав и не се двоумам да ги чувам Твоите заповеди.

⁶¹Ме сплеткаа јажињата на грешниците, но јас не го заборавам Твојот Закон.

⁶²Станувам, на полноќ, за да Те славам, заради Твоите праведни одлуки.

⁶³Пријател сум им на сите, што се бојат од Тебе и што ги чуваат Твоите наредби.

⁶⁴Господи, земјата е полна со Твојата милост, научи ме на Твоите повелби.

⁶⁵ТЕТ. Господи, му стори добро на Твојот слуга, според Твојот збор.

⁶⁶Научи ме на разум и знаење, зашто верувам во Твоите заповеди.

⁶⁷Скитав, пред да бидам понижен, но сега го чувам Твојот збор.

⁶⁸Ти си толку благ и добар, научи ме на Твоите правила.

⁶⁹Горделивите смислуваат клевета против мене, но јас со сето срце се придржувам кон Твоите правила.

⁷⁰Срцето им е здебелено од маст, а јас се насладувам во Твојот Закон.

⁷¹Добро ми е дека се мачев за да ги научам Твоите повелби.

⁷²Помил ми е Законот на Твојата уста, отколку илјади златници и сребреници.

⁷³ЈОД. Твоите раце ме направија и ме создадоа; вразуми ме за да ги научам Твоите заповеди.

⁷⁴Оние кои се бојат од Тебе се веселат кога ќе ме видат, зашто јас се надевам на Твојот збор.

⁷⁵Знам, о Господи, дека Твоите судови се праведни, и според верноста Твоја Ти ме измачи.

⁷⁶Твојата љубов нека ми биде тешителка, според ветувањето што му го даде на Твојот слуга.

⁷⁷Нека дојде врз мене Твојата милост, и јас ќе живеам, зашто Твојот Закон е моја наслада.

⁷⁸Нека се збунат гордите, зашто ме угнетуваат за ништо, а јас ќе размислувам за Твоите наредби.

⁷⁹Нека се обратат кон мене оние кои се бојат од Тебе, и кои ги знаат Твоите сведоштва.

⁸⁰Нека моето срце биде совршено во Твоите повелби, за да не бидам засрамен.

⁸¹КАФ. Мојата душа копнее за Твоето спасение, со надеж го чекам Твојот збор.

⁸²Моите очи копнеат за Твојата беседа; кога ќе ми донесеш утеха?

⁸³Станав како мев во дим, но не ги заборавам Твоите повелби.

⁸⁴Колку денови има Твојот слуга? Кога ќе ги судиш моите гонители?

⁸⁵Гордите ми ископаа јама: тие не работат според Твојот Закон.

⁸⁶Сите Твои заповеди се вистински: невин ме гонат, помогни ми!

⁸⁷За малку ќе ме погубеа во земјата, но јас не ги оставам Твоите наредби.

⁸⁸Оживеј ме според Твојата милост, и ќе ги чувам сведоштвата на Твојата уста.

⁸⁹ЛАМЕД. О Господи, Твојот збор останува довека, постојан како небесата.

⁹⁰Твојата милост е од род до род; ја зацврсти земјата, и таа стои.

⁹¹Стојат засекогаш според Твоите закони, зашто сè Ти служи Тебе.

⁹²Да не е Твојот Закон: мое уживање, би пропаднал во мојата неволја.

⁹³Нема да ги заборавам Твоите наредби довека, зашто преку нив Ти ме оживуваш.

⁹⁴Твој сум, спаси ме; зашто јас ги барам Твоите наредби.

⁹⁵Грешниците дебнат за да ме погубат, но јас внимавам на Твоите сведоштва.

⁹⁶Му ја гледам границата на секое совршенство, а Твојата заповед нема граница.

⁹⁷МЕМ. О, колку го љубам Твојот Закон, по цел ден размислувам за него.

⁹⁸Твојата заповед ме направи помудар од моите непријатели, зашто таа е вечно со мене.

⁹⁹Поумен сум од сите мои учители, зашто размислувам за Твоите сведоштва.

¹⁰⁰Поразумен сум и од старците, зашто ги чувам Твоите наредби.

¹⁰¹Воздржи ги моите нозе од лошиот пат, за да го запазам Твојот збор.

¹⁰²Не отстапувам од Твоите судови, зашто Ти ме поучи.

¹⁰³Колку се слатки на моето непце Твоите зборови, послатки се од мед во мојата уста.

¹⁰⁴Станувам разумен според Твоите повелби зашто ги мразам сите лажни патишта.

¹⁰⁵НУН. Твоето слово е светилка на мојата нога и светлина на мојата патека.

¹⁰⁶Се колнам и одлучувам цврсто, да ги одржам Твоите праведни одлуки.

¹⁰⁷Во голема неволја сум Господи, оживотвори ме според Твоето слово.

¹⁰⁸Прими ги доброволните приноси на мојата уста, Господи, научи ме на Твоите судови.

¹⁰⁹Мојот живот е во постојана гибел, но јас не го заборавам Твојот Закон.

¹¹⁰Грешниците ми поставија стапица, но не се отклонувам од Твоите наредби.

¹¹¹Твоите сведоштва ми се вечно наследство, тие се радост во моето срце.

¹¹²Го приклонив срцето, за да ги врши Твоите повелби, секогаш и до крај.

¹¹³САМЕХ. Јас ги мразам неодлучните, а го љубам Твојот Закон.

¹¹⁴Ти Си мој штит и мое засолниште, Јас се надевам на Твоето слово.

¹¹⁵Отстранете се од мене злосторници, ќе ги пазам заповедите на мојот Бог.

¹¹⁶Поткрепи ме според Твоето ветување, и ќе живеам; немој да се засрамам во својата надеж.

¹¹⁷Помогни ми и ќе се спасам, ќе внимавам секогаш на Твоите повелби.

¹¹⁸Ти ги презираш оние, што отстапуваат од Твоите повелби зашто е лажна нивната мисла.

¹¹⁹Ги отстранувам како ѓубре злотворите на земјата, затоа ги љубам Твоите сведоштва.

¹²⁰Моето тело трепери од страв пред Тебе, јас се плашам од Твоите судови.

¹²¹АИН. Направив суд и правда не ме предавај на моите угнетувачи.

¹²²Застапи се за Твојот слуга, за да не ме сотрат горделивите!

¹²³Моите очи копнеат за Твоето спасение, за Твојот праведен збор.

¹²⁴Постапувај со Твојот слуга според Твојата милост и научи ме на Твоите повелби.

¹²⁵Јас сум Твој слуга, вразуми ме, за да ги запознаам Твоите сведоштва.

¹²⁶О Господи, време е да дејствуваш: зашто го нарушија Твојот Закон.

¹²⁷Затоа ги љубам Твоите заповеди, повеќе од злато, од пречистено злато.

¹²⁸Затоа ги почитувам сите Твои наредби, во секое нешто, омразени ми се сите лажни патишта.

¹²⁹ПЕ. Прекрасни се Твоите сведоштва, затоа мојата душа ги пази.

¹³⁰Објаснувањето на Твоите зборови просветлува, ги вразумува простодушните.

¹³¹Ја отворам мојата уста и воздивнувам, зашто копнеам за Твоите заповеди.

¹³²Сврти се кон мене и биди ми милостив, како на оние, кои го љубат Твоето име.

¹³³Управувај ги моите чекори, за да не завладее со мене никакво беззаконие.

¹³⁴Избави ме од човечкото насилство, и ќе ги чувам Твоите наредби.

¹³⁵Со Твоето лице осветли го Твојот слуга, и научи ме на Твоите повелби!

¹³⁶Потоци солзи потекоа од моите очи, зашто не се запазува Твојот Закон.

¹³⁷ЦАДЕ. Праведен си, Господи, и прави се Твоите судови.

¹³⁸Твоите сведоштва што си ги заветувал се правда и величествена вистина.

¹³⁹Мојата ревност ме подјадува, зашто моите угнетувачи ги забораваат Твоите зборови.

¹⁴⁰Твоите зборови се испитани многу, затоа Твојот слуга ги љуби.

¹⁴¹Мал сум и презрен, но Твоите наредби не ги заборавам.

¹⁴²Твојата правда е вечна правда и Твојот Закон е чиста вистина.

¹⁴³Ме снајдоа тешкотии и неволји; но Твоите заповеди се моја наслада.

¹⁴⁴Вечна е правдата на Твоето сведоштво, вразуми ме, и ќе живеам.

¹⁴⁵КОФ. Викам, од сето срце, Господи, послушај ме: ќе ги пазам Твоите повелби.

¹⁴⁶Кон Тебе викам, спаси ме, ќе се држам за Твоите сведоштва.

¹⁴⁷Ја престигнав зората и се молам за помош, се надевам на Твоите зборови.

¹⁴⁸Моите очи ги престигнуваат ноќните стражи, за да размислувам за Твојата беседа.

¹⁴⁹Господи, послушај го мојот глас, според Твојата добрина, и оживи ме според Твојата одлука.

¹⁵⁰Наближуваат оние кои ме гонат неправедно, тие се далеку од Твојот Закон.

¹⁵¹А и Ти си близу, Господи, и сите Твои заповеди се вистина.

¹⁵²Одамна знам за Твоите сведоштва дека ги создаде засекогаш.

¹⁵³РЕШ. Погледај на мојата неволја, избави ме, зашто не го заборавам Твојот Закон.

¹⁵⁴Брани ја мојата парница и откупи ме, поживи ме според Твоето ветување.

¹⁵⁵Спасението е далеку од грешниците, зашто не се грижат за Твоите повелби.

¹⁵⁶Голема е, Господи, Твојата милост: поживи ме според Твоите одлуки.

¹⁵⁷Мнозина ме гонат и угнетуваат, јас не отстапувам од Твоите прописи.

¹⁵⁸Ете, видов отпадници и ми се згадија, зашто не ги чуваа Твоите зборови.

¹⁵⁹Ете, ги љубам Твоите зборови, о Господи, поживи ме според Твојата милост.

¹⁶⁰Целината на Твојот збор е вистина, секој од Твоите праведни судови е вечен.

¹⁶¹ШИН. Кнезовите ме прогонуваат без причина, но моето срце трепери само пред Твоите зборови.

¹⁶²Им се радувам на Твоите беседи, како оној што наоѓа многу користи.

¹⁶³Ја мразам лагата и се гнасам од неа, а го љубам Твојот Закон.

¹⁶⁴Те прославувам Тебе седумпати дневно, заради Твоите праведни судови.

¹⁶⁵Оние кои го љубат Твојот Закон, уживаат голем мир, не се сопнуваат на ништо.

¹⁶⁶Ја чекам Твојата помош, о Господи, ги извршувам Твоите заповеди.

¹⁶⁷Мојата душа ги чува Твоите сведоштва и ги љуби многу.

¹⁶⁸Ги чувам Твоите наредби и Твоето сведоштво, зашто сите мои патишта се пред Тебе.

¹⁶⁹ТАВ. Господи, моето викање нека стигне до Тебе, вразуми ме според Твојот збор.

¹⁷⁰Нека дојде мојата молитва пред Твоето лице, избави ме според Твојот збор.

¹⁷¹Моите усни нека запеат пофална песна, зашто ме научи на Твоите повелби.

¹⁷²Мојот јазик нека пее за Твоето слово, зашто сите Твои заповеди се праведни.

¹⁷³Твојата рака нека ми биде на помош, зашто ги избрав Твоите наредби!

¹⁷⁴Господи, копнеам за Твоето спасение, се насладувам во Твојот Закон.

¹⁷⁵Нека живее мојата душа и нека Те фали, а Твоите судови нека ми бидат на помош!

¹⁷⁶Јас заскитав како изгубена овца; о побарај го Твојот слуга, зашто јас не ги заборавив Твоите заповеди.