Read Библија, Константинов Псалми 139 Bible Online

Псалми 139 - Библија, Константинов bible

Псалми 139

¹За началник на пејачи. Давидов псалм. Господи, ме согледуваш целиот и ме познаваш,

²Ти знаеш кога седнувам и кога станувам, веќе оддалеку ги знаеш моите мисли.

³Дали одам или лежам, Ти гледаш сè, познати ти се сите мои патишта.

⁴Додека мојот збор уште не дошол до јазикот, а Ти, Господи, веќе сè знаеш.

⁵Ти ме опфаќаш од плеќите и од лицето, Твојата рака ја стави врз мене.

⁶Тоа знаење премногу е чудно за мене, превисоко е, за да можам да го стигнам.

⁷Каде да одам од Твојот Дух и каде да побегнам од Твоето лице?

⁸Ако се вознесам на небото: таму си, ако легнам во подземјето: и таму си.

⁹Ако ги земам крилата на зората и се населам на крајот на морето,

¹⁰и таму, Твојата рака ќе ме води, Твојата десница ќе ме држи.

¹¹Ако речам: „Нека ме скријат темнините, но дури и ноќта ќе биде како светло околу мене!”

¹²Ни темнината за Тебе не ќе биде темна: ноќта свети како ден и темнината е како светлина.

¹³Зашто Ти ги создаде моите бубрези, ме истка во мајчиното крило.

¹⁴Ти благодарам што сум создаден толку чудесно, што се Твоите дела прекрасни. Мојата душа тоа добро го знае.

¹⁵Моите коски не Ти беа скриени додека се создавав во тајност, ткаени во длабочината на земјата.

¹⁶Твоите очи го видоа мојот зародишок, веќе сè беше запишано во Твојата книга; деновите ми беа одредени, уште додека не беше ниеден.

¹⁷Колку ми се драгоцени Твоите науми, Боже, колку е непресметлив нивниот број.

¹⁸Да ги бројам! Повеќе се од песок! Кога се будам, уште сум со Тебе!

¹⁹Боже, истреби ги злотворите, нека отстапат од мене крволоците!

²⁰Зашто се бунтуваат подмолно против Тебе, напразно се подигаат Твоите непријатели.

²¹Господи, зар да не ги мразам Твоите мразители? Зар да не ми се гадат Твоите противници?

²²Јас ги мразам со далабока омраза и ги сметам за свои непријатели.

²³Испитај ме целиот, Боже, запознај ми го срцето, испитај ме и запознај ги моите мисли:

²⁴Погледај да не одам по гибелен пат и поведи ме по вечниот пат!