Read Библија, Константинов Псалми 143 Bible Online

Псалми 143 - Библија, Константинов bible

Псалми 143

¹Давидов псалм. Господи, послушај ја мојата молитва, чуј ја мојата молба, по Твојата вистина; услиши ме по Твојата правда.

²Не оди на суд со Твојот слуга, зашто никој жив не е праведен пред Тебе!

³Непријателот ми ја гони душата, до земјата го притисна мојот живот; ме фрли да престојувам во темнина, како оние што умреа одамна.

⁴Мојот дух веќе примира во мене, моето срце трпне во градите.

⁵Си спомнувам за минатите дни, размислувам за сите Твои дела; размислувам за делата на Твоите раце.

⁶Ги пружам своите раце кон Тебе, мојата душа, како сува земја, жеднее по Тебе.

⁷Послушај ме поскоро, о Господи, мојот дух изнемоштува! Не криј го Своето лице пред мене, за да не станам како оние што слегуваат во гробовите.

⁸Соопшти ми ја наутро Твојата милост, зашто се надевам на Тебе. Покажи ми го патот по кој да тргнам, зашто ја вознесувам душата кон Тебе.

⁹Избави ме, Господи, од моите непријатели, јас прибегнувам кон Тебе.

¹⁰Научи ме да ја исполнувам Твојата волја, зашто Ти си мој Бог. Твојот благ Дух нека ме води по рамен пат!

¹¹Заради Твоето име, Господи, оживи ме, заради Твојата справедливост изведи ми ја душата од тешкотија!

¹²Според Твојата милост, сотри ги моите непријатели, погуби ги моите угнетувачите на мојата душа, зашто јас сум Твој слуга.