Read Библија, Константинов Псалми 145 Bible Online

Псалми 145 - Библија, Константинов bible

Псалми 145

¹Давидова благодарност. Ќе Те прославувам о Боже, мој Царе, ќе го благословувам Твоето име секогаш и довека.

²Ќе Те славам секој ден, ќе Го фалам Твоето име секогаш и довека.

³Господ е велик и достоен за секоја пофалба, Неговата величина е недостижна!

⁴Од поколение во поколение се фалат Твоите дела и се навестуват Твоите силни дела.

⁵Ќе зборувам за блескавата слава на Твоето величие, и за Твоите чуда.

⁶Кажуваат за страотната сила на Твоите дела, јас ќе ја раскажувам Твојата величина.

⁷Го разгласуваат споменот за Твојата голема благост, и ја опеваат Твојата правда.

⁸Жалостив и милостив е Господ, долготрпелив и многумилостив.

⁹Господ е благ за сите, милостив за сите Свои дела.

¹⁰Нека Те слават, Господе, сите Твои дела, и твоите свети нека Те благословуваат!

¹¹Нека зборуваат за славата на Твоето Царство, нека говорат за Твојата сила.

¹²Да ги објават на човечките деца: Твојата сила и славата на Твоето прекрасно Царство.

¹³Твоето царство е вечно Царство, Твоето владеење за сите поколенија.

¹⁴Господ ги поткрепува сите кои паѓаат и Тој ги исправа наведнатите.

¹⁵Очите на сите се свртени кон Тебе, Ти им даваш храна во право време.

¹⁶Ти ја отвораш Твојата рака, и наситуваш желбата на сè живо.

¹⁷Праведен Си, Господи, на сите Твои патишта, и добар Си во сите Твои дела.

¹⁸Господ е близу до сите кои Го повикуваат, до сите што Го призиваат искрено.

¹⁹Тој ги исполнува желбите на оние кои се бојат од Него, ги слуша нивните повици и ги спасува.

²⁰Господ ги пази оние, кои Го љубат, а ќе ги сотре сите злосторници.

²¹Нека мојата уста искажува фалба на Господа, и секое тело нека Го слави Неговото свето име, секогаш и довека.