Read Библија, Константинов Псалми 16 Bible Online

Псалми 16 - Библија, Константинов bible

Псалми 16

¹Давидова песна. Пази ме, Боже, зашто се надевам на Тебе.

²Му реков на Господа: „Ти си мој Господ; нема блаженство без Тебе.”

³Во светите на земјата и во избраните, во нив е сета моја радост!

⁴Ќе се умножат жалостите на оние, кои следат туѓи богови; нема да ги принесам нивните крвни приливи, ниту со својата уста ќе ги земам нивните имиња.

⁵Господ е дел на моето наследство и мојата чаша. Ти го запазуваш моето достоинство.

⁶Мојот дел зафати пријатни места; да, добив прекрасно наследство!

⁷Го благословувам Господа, Кој ме вразумува; па и ноќе моето срце ме советува.

⁸Господ ми е секогаш пред очите; бидејќи ми е од десната страна, нема да се сопнам.

⁹Затоа ми се зарадува срцето и се развесели мојата слава, а моето тело се одмора во надеж.

¹⁰Зашто нема да ја оставиш мојата душа во Подземјето, ниту ќе дозволиш твојот светец да види гниење.

¹¹Ќе ми го покажеш патот на животот, во Твоето присуство има полнота на радоста, десно од Тебе - вечно блаженство.