Read Библија, Константинов Псалми 17 Bible Online

Псалми 17 - Библија, Константинов bible

Псалми 17

¹Давидова молитва. Послушај ја, Господи, правдата, чуј го мојот глас, услиши ја мојата молитва од искрени усни!

²Од Тебе нека ми дојде пресудата, Твоите очи гледаат што е справедливо.

³Испитај го моето срце, посети ме ноќе, искушај ме, но нема да најдеш ништо; мојата уста не згреши.

⁴Како што грешат луѓето: според зборовите на Твојата уста, се сочував од патиштата на насилниците.

⁵Моите стапки ги држаа Твоите патишта, не се лизнаа моите нозе.

⁶Кон Тебе викам, Боже, зашто Ти ќе ме послушаш! Наведни го Твоето уво кон мене и чуј ги моите зборови.

⁷Прослави ја врз мене Твојата милост, о Спасителу, Ти Кој ги спасуваш, оние што се надеваат на Твојата десница, од оние што се креваат против нив.

⁸Пази ме како зеница на окото, засолни ме во сенката на Своите крила,

⁹од злотворите што се нафрлаат врз мене. Од непријателите на мојата душа, што ме опкружуваат.

¹⁰Го затворија своето срце и со устата зборуваат гордо.

¹¹Нивните чекори сега ме опкружуваат; сакаат да ме кутнат на земја.

¹²Тие се како лав што сака да раскине и како лавче што дебне потајно.

¹³Стани, Господи, пресретни го и кутни го, со Својот меч спаси го мојот живот од нечесниот,

¹⁴а со Својата рака, Господи, од луѓето, од луѓето на овој свет, чиј дел е овој живот; чиј желудник го полниш со Своите богатства, така што и нивните синови ќе бидат сити, а остатокот ќе им остане на нивните внуци.

¹⁵А јас ќе го гледам Твоето лице во правда, и еднаш кога ќе се разбудам, ќе се наситам од Твојот изглед.