Read Библија, Константинов Псалми 18 Bible Online

Псалми 18 - Библија, Константинов bible

Псалми 18

¹На пејачкиот началник. Од Господовиот слуга Давид, кој му ја испеа оваа песна, кога Господ го избави од рацете на сите негови непријатели и од рацете на Саула. Тој рече: Те љубам, Господи, тврдино моја!

²Господи, карпо моја, крепост моја, спасение мое; Боже мој, карпо моја, во Кого барам прибежиште, штит мој, рог на моето спасение, тврдино моја!

³Ќе Го повикам Господа, Кој е предостоен за фалба и ќе бидам избавен од непријателите.

⁴Брановите на смртта ме опкружија, и порои од лоши луѓе ме исплашија.

⁵Јажињата на Подземјето ме изврзаа, смртоносните примки ме стегнаа:

⁶Во својата неволја Го повикав Господа, и извикав кон својот Бог. Тој го чу мојот повик, од Својот храм, и моето викање стигна до Неговите уши.

⁷Тогаш земјата се стресе и се растрепери, се разнишаа основите на планините, се раздвижија, зашто Тој се разгневи.

⁸Од Неговите ноздри се крена дим, а од Неговата уста оган, што голта; јаглења се распалија од Него.

⁹Тој ги наведна небесата и слезе, и мрак беше под Неговите нозе.

¹⁰Седна врз херув и летна; леташе врз крилјата на ветерот.

¹¹Ја направи темнината Свое тајно засолниште, се покри со темните води и со густите облаци.

¹²Од светкање пред Него, низ Неговите облаци удрија град и огнени јаглења.

¹³Господ загрме од небото, Сèвишниот го даде Својот глас: град и огнени јаглења.

¹⁴Ги прати своите стрели и ги распрсна, и ги расфрли секавиците;

¹⁵тогаш се покажаа морските дна, основите на вселената се открија, од Твојата закана, Господи, од дувањето на здивот на Твојот гнев.

¹⁶Ја испружи Својата рака од небото и ме подзеде, ме извлече од големи води.

¹⁷Ме избави од силниот непријател, од оние што ме мразеа, зашто беа посилни од мене.

¹⁸Станаа против мене во денот на мојата неволја, но Господ ми стана поткрепа.

¹⁹Ме изведе на широко место, ме избави зашто му бев мил.

²⁰Господ ми даде според мојата праведност; ме награди според чистотата на моите раце;

²¹зашто ги запазив Господовите патишта и не се оддалечив од својот Бог.

²²Сите Негови закони се пред мене, не ги отфрлив Неговите заповеди,

²³бев непорочен пред Него и се чував од своето беззаконие.

²⁴Затоа Господ ми врати според мојата правда, според чистотата на моите раце пред Неговите очи.

²⁵Со милостивиот, Ти си милостив, на чесниот со чесност му враќаш;

²⁶со чистиот Ти си чист, а со развратниот Ти си спротивен од него;

²⁷зашто Ти ги спасуваш нажалените луѓе, а ги понизуваш гордите очи.

²⁸Ти ја запалуваш мојата светлина, Господи мој Боже, Ти ја осветлуваш мојата темнина:

²⁹Зашто преку Тебе го разбивам полкот, со мојот Бог прескокнувам преку ѕид.

³⁰Божјиот пат е совршен; Божјото слово е испитано. Тој е штит на сите, кои се надеваат на Него.

³¹Зашто кој е Бог освен Господ? кој е Карпа освен нашиот Бог?

³²Бог, кој ме препашува со сила и го прави совршен мојот пат;

³³ми даде брзи нозе како на елените и ме постави на моите височини,

³⁴ми ги учи рацете за бој, така што моите мишки оптегнуваат бронзен лак.

³⁵Ти ми го даваш штитот на Своето спасение, Твојата десница ме поддржува, а Твојата благост ме возвеличува.

³⁶Ти го шириш мојот чекор, под мене, така што моите нозе не се сопнуваат.

³⁷Ги гонев своите непријатели и ги стигнав и не се вратив додека не ги истребив.

³⁸Ги поразувам и не можат да се кренат, паднаа под моите нозе.

³⁹Зашто Ти ме препаша со сила за бој; ги отстрани пред мене, оние што стануваат против мене.

⁴⁰Ти направи моите непријатели да ми го вртат грбот, за да ги истребам оние што ме мразат.

⁴¹Тие викаат, но нема избавител, кон Господа, но Тој не ги слуша.

⁴²Тогаш ги ситнев како прав пред ветерот, ги газев како кал по улиците.

⁴³Ти ме избави од народната буна, ме постави главатар на народите; ми служи народ што не го познавав.

⁴⁴Штом чуја за мене, тие ме послушаа, ми се покоруваат туѓинци.

⁴⁵Туѓинците ослабеа, треперејќи излегуваат од своите тврдини.

⁴⁶Жив е Господ! Благословена да е мојата Карпа! Нека се возвиси Бог на моето спасение!

⁴⁷Бог, Кој одмаздува за мене, и ми ги покорува народите.

⁴⁸Кој ме избавува од моите непријатели! Ме издига над оние што стануваат против мене, ме спасува од насилниците.

⁴⁹Затоа ќе Те славам, Господи, среде народите и ќе му пеам на Твоето име:

⁵⁰Славно го избавуваш Твојот цар и му искажуваш милост на Твојот помазаник, на Давида и на неговото потомство довека.