Read Библија, Константинов Псалми 19 Bible Online

Псалми 19 - Библија, Константинов bible

Псалми 19

¹За пејачкиот началник. Давидов псалм. Небесата ја раскажуваат Божјата слава, небесниот свод го навестува делото на Неговите раце.

²Денот на ден му го објавува тоа, а ноќта на ноќ и соопштува.

³Нема говор ни јазик, каде не ќе се чуе нивниот глас.

⁴Нивната вест се рашири по целата земја, а нивните зборови до крајот на вселената. Таму, за сонцето Тој оптегнува шатор,

⁵кое излегува како младоженец од својата ложница, се радува како јунак кога ја претрчува патеката.

⁶Излегува од небесниот крај и обиколува до крајот; и ништо не се крие од неговата топлина.

⁷Господовиот Закон е совршен - ја крепи душата; Господовото сведоштво е верно - му дава мудрост на неукиот;

⁸Господовите повелби се праведни - го веселат срцето; Господовата заповед е светла - ги просветлува очите;

⁹Стравот од Господа е чист - останува довека; Господовите судови се вистински - сите се еднакво праведни;

¹⁰Поскапоцени се од златото, од чистото злато; Послатки се од медот, послатки од капките на медовата пита.

¹¹Твојот слуга е предупреден од нив, кој ги чува има голема награда.

¹²Но, кој ги сознава своите погрешки? Очисти ме од тајните прегрешувања!

¹³Запази го Својот слуга од гордоста, да не завладее со мене. Тогаш ќе бидам непорочен, чист од голем грев.

¹⁴Зборовите на мојата уста и размислувањата на моето срце, нека бидат угодни пред Тебе, Господи, Тврдино моја и Избавителу мој.