Read Библија, Константинов Псалми 21 Bible Online

Псалми 21 - Библија, Константинов bible

Псалми 21

¹За пејачки началник. Давидов псалм. Господи, царот се весели со Твојата сила, колку му е голема радоста дека Ти спасуваш!

²Ти ја исполни желбата на неговото срце и не ја одби молитвата на неговите усни.

³Зашто Ти го пресретна со благослови на добрината, врз главата му стави круна од чисто злато.

⁴Тој Те молеше за живот, и Ти му даде премногу дни - за вечни векови.

⁵Со Твојата помош, неговата слава е голема, го украси со чест и величество.

⁶Зашто Ти го направи благословен довека, го развесели со радоста на Своето лице.

⁷Навистина, царот се надева на Господа, и заради благоста на Сèвишниот нема да се колеба.

⁸Твојата рака ќе ги најде сите Твои непријатели, Твојата десница ќе ги најде оние што Те мразат!

⁹Ќе ги направиш како вжарена печка, во времето на Твојата лутина! Господ ќе ги сотре со гнев и огнот ќе ги голтне!

¹⁰Ќе го сотреш нивниот плод од земјата и нивното потомство помеѓу човечките чеда.

¹¹Зашто, намислија зло против Тебе, подготвија заговор и не можеа да го исполнат.

¹²Затоа Ти ќе ги натераш да го свртат грбот, и Својот лак ќе го насочиш кон нивното лице.

¹³Стани, Господи, со Својата сила! Ние ќе пееме и ќе ја славиме Твојата сила.