Read Библија, Константинов Псалми 27 Bible Online

Псалми 27 - Библија, Константинов bible

Псалми 27

¹Давидов псалм (Пред помазаник). Господ ми е светлина и спасение, од кого да се плашам? Господ е штит на мојот живот, пред кого да треперам?

²Кога ќе се доближат до мене злосторниците, моите противници и непријатели, за да ми ја изедат снагата, тие се сопнуваат и паѓаат.

³Ако војска се крене против мене, моето срце не се бои; ако избувне и војна против мене, и тогаш сум полн со надеж.

⁴За едно Му се молам на Господа, само тоа го барам: Да живеам во Господовиот дом, во текот на сите дни на мојот живот; да уживам во Господовата убавина, и да истражувам во Неговиот Храм.

⁵Тој ме засолнува во Својот шатор, во зол ден; ме крие во скрилница на Својот шатор, Тој ме издига на карпа.

⁶И сега ја кревам главата над непријателите што ме опкружуваат. Ќе принесувам радосни жртви во Неговиот шатор, ќе пеам и ќе се радувам во Господа.

⁷О, Господи, слушај го мојот глас кога викам, биди ми милостив и услиши ме!

⁸Моето срце зборува: „Барај го Моето лице!” Да, го барам Твоето лице, Господи.

⁹Не го криј Твоето лице од мене! Не отфрлај го во гнев Твојот слуга! Ти, помош моја, не ме отфрлај! И не оставај ме, Боже, Спасителу мој!

¹⁰Ако татко ми и мајка ми ме остават, Господ ќе ме прими.

¹¹Научи ме, Господи, на Својот пат, поведи ме по рамна патека, заради моите противници.

¹²Не ме предавај на бесот на моите непријатели, зашто лажни сведоци станаа против мене, кои дишат со насилство.

¹³Верувам дека ќе ги уживам Господовите добрини во земјата на живите.

¹⁴Надевај се на Господа, охрабри се! Нека биде цврсто твоето срце! Да, чекај Го Господа!