Read Библија, Константинов Псалми 35 Bible Online

Псалми 35 - Библија, Константинов bible

Псалми 35

¹Давидов псалм. Господи! Опкружи ги моите обвинители и војувај против оние, кои војуваат против мене!

²Стави оклоп, земи го Твојот штит и стани да ми помогнеш!

³Замавтај со копјето и пресретни ги моите гонители, Речи и на мојата душа: „Јас сум твое спасение.”

⁴Нека се збунат и посрамат оние, кои ја бараат мојата душа, нека се повлечат и збунат оние, кои мислат зло!

⁵Нека бидат како плева на ветер, кога Господовиот ангел ќе ги спотера!

⁶Мрачни и лизгави нека им бидат патиштата, кога Господовиот ангел ќе ги гони!

⁷Зашто без причина ми оптегнаа мрежа; без причина ископаа гроб за мојата душа.

⁸Гибелта ќе ги стигне одненадеж, и сами ќе се фатат во мрежата што ја оптегнаа; ќе паднат во јамата што ја ископаа!

⁹А мојата душа ќе се весели во Господа, ќе се радува во Неговото спасение.

¹⁰Сите мои коски ќе речат: „Господи кој е како Тебе, Кој го спасуваш бедникот од силникот, бедникот и сиромашниот од ограбувачот?”

¹¹Неправедни сведоци станаа: ме прашуваат за она што не знам.

¹²Ми враќаат зло за добро, мојата душа запаѓа во осаменост.

¹³А јас носев вреќиште, кога тие беа болни ја измачував својата душа со пост, и молитвата ми се враќаше во пазувата.

¹⁴Обиколував тажен, како за пријател, за брат, од тага се наведнав, како оној што жали за мајката.

¹⁵А сега кога се сопнав јас, тие се радуваат, се собраа против мене, за да удрат одненадеж, и непрекратно ме растргнуваат.

¹⁶Со нечесните и потсмешливи безработници, чкртаат со забите на мене.

¹⁷О, Господи! До кога ќе гледаш? Избави ми ја душата од нивните напади, одземи им го на лавовите единственото мое добро!

¹⁸Ќе Ти благодарам во големо собрание, ќе Те славам меѓу многубројни луѓе.

¹⁹Нека не се радуваат над мене неправедните непријатели, нека не намигнуваат со очите оние, што ме мразат без причина.

²⁰Зашто тие не мислат за мир, туку измислуваат сплетки против мирните во земјата.

²¹Широко ги отвораат устите против мене и зборуваат: „Добро, добро, видовме со свои очи!”

²²Господи, Ти гледаш сè! Не премолчувај! Господи, не оддалечувај се од мене!

²³Тргни се, стани да ме одбраниш, Боже мој, Господи, води ја мојата парница.

²⁴Суди ме Господи, Боже мој, според Твојата правда, нека не се радуваат над мене.

²⁵Нека не мислат во срцето: „Ни се исполни желбата!” ниту да речат: „Го проголтавме!”

²⁶Нека се посрамат и засрамат сите заедно, кои се радуваат на мојата несреќа! Нека се облечат во срам и срамење, оние што се креваат против мене!

²⁷Нека викаат радосно, кои ја посакуваат мојата правда, и нека зборуваат секогаш: „Господ е величествен! Кој му посакува благодат на Својот слуга!

²⁸А мојот јазик ќе раскажува за Твојата правда и за Твојата фала, секој ден.