Read Библија, Константинов Псалми 37 Bible Online

Псалми 37 - Библија, Константинов bible

Псалми 37

¹Давидов псалм. Не се лути на злосторниците, ниту им завиди на оние што прават беззаконие.

²Се сушат брзо како трева, венеат брзо како зелено растение.

³Надевај се на Господа и прави добро, живеј на земјата и храни се со вистината.

⁴Сета твоја радост нека биде во Господа: Тој ќе ги исполни желбите на твоето срце!

⁵Предај Му ги на Господа своите патишта, надевај се на Него, и Тој ќе води сè.

⁶Твојата правда ќе блесне како светлина и твојот суд како пладне.

⁷Смири се пред Господа и надевај се на Него, не дразни се заради оној, кој напредува на својот пат, заради човекот кој кове подлост.

⁸Стивни го својот гнев и остави ја лутината, не се дразни за да не направиш зло.

⁹Зашто злосторниците ќе бидат сотрени, а кои се надеваат на Бога, ќе ја наследат земјата.

¹⁰Уште малку и ќе го снема безбожникот, ќе го бараш неговото место, а него веќе ќе го нема.

¹¹Кротките ќе ја наследат земјата, тие ќе уживаат во изобилен мир.

¹²Безбожникот му смислува зло на праведникот и со забите чкрта на него.

¹³А Господ му се смее, зашто гледа дека доаѓа неговиот ден.

¹⁴Безбожниците истргнуваат меч и оптегнуваат лакови, за да ги оборат немоќните и бедните, да ги заколат оние, што одат по прав пат.

¹⁵Со мечот ќе го прободат сопственото срце, ќе се скршат нивните лакови.

¹⁶Подобро е и малку на праведникот, отколку големо благо на многу безбожници.

¹⁷Зашто рацете на злотворот ќе се скршат, а Господ е поткрепа на праведникот.

¹⁸Господ се грижи за животот на чесните, нивното наследство ќе трае довека.

¹⁹Нема да се засрамат во време на неволја, ќе бидат сити во дните на глад.

²⁰А безбожниците ќе пропаднат, Господовите врагови ќе овенат како цвеќе по ливаѓето, ќе се расплинат како дим.

²¹Безбожникот заема но не враќа, праведникот се сожалува и дава.

²²Оние кои Господ ќе ги благослови, ќе ја наследат земјата, а кои ќе ги проколне, ќе бидат истребени.

²³Господ ги води и зацврстува чекорите на добриот човек, и мил Му е неговиот пат.

²⁴И ако се сопне, нема да падне, зашто Господ го држи за рака.

²⁵Млад бев и остарев, но не видов напуштен праведник или неговите деца да просат леб.

²⁶Секогаш е милостив и дава на заем, благослов е врз неговото потомство.

²⁷Отстранувај се од злото и прави добро и ќе останеш довека.

²⁸Зашто Господ ја љуби правдата и Своите свети не ги остава. Засекогаш ќе бидат сочувани, ќе биде истребено потомството на безбожниците.

²⁹Праведните ќе ја наследат земјата и ќе живеат довека на неа.

³⁰Праведниковата уста кажува мудрост, а неговиот јазик говори право.

³¹Божјиот закон му е во срцето, неговите чекори не се колебаат.

³²Грешникот го демне праведникот и бара да го убие;

³³но Господ нема да го остави во негова власт и не ќе допушти да го осудат на суд.

³⁴Надевај се на Господа и држи се за Неговиот пат; Тој ќе те возвиши и ќе ја наследиш земјата; радосно ќе ја гледаш пропаста на безбожните.

³⁵Видов бесен злосторник, како се шири како разгранчен кедар.

³⁶Поминав и ете - го нема веќе; го побарав, и не го најдов.

³⁷Набљудувај го чесниот и гледај го непорочниот; миротворецот има потомство.

³⁸А сите грешници ќе бидат откорнати, ќе биде истребено злочинечкото семе.

³⁹Од Господа доаѓа спасение на праведните, Тој им е засолниште во лоши времиња.

⁴⁰Господ им помага, Тој ги избавува: Тој ќе ги избави од нечесните и ќе ги спаси, зашто кај Него бараат прибежиште.