Read Библија, Константинов Псалми 38 Bible Online

Псалми 38 - Библија, Константинов bible

Псалми 38

¹Давидов псалм. Господи, не ме изобличувај во Твојата јарост и не ме казнувај во Твојот гнев.

²Твоите стрели се закачија во мене, Твојата рака ме притисна тешко.

³На моето тело нема ништо здраво заради Твојот гнев, од моите гревови нема мир за моите коски.

⁴Зашто беззаконијата на мојата глава ме надвишија, ме притиснуваат како претешко бреме.

⁵Моите рани смрдат и гнојат заради мојата безумност.

⁶Се згрбавив и се собрав, постојано скитам натажен.

⁷Зашто мојата внатрешност гори, и нема здравје во телото мое.

⁸Исцрпен сум и сосем сотрен, офкам од плачот на моето срце.

⁹О, Господи, сите мои желби се пред Тебе, и моите повици не Ти се скриени.

¹⁰Моето срце удира силно, силата ме остава, и гасне светлината на очниот вид.

¹¹Пријателите и другарите се отстранија од моите рани, и моите најблиски стојат далеку.

¹²Ми поставуваат стапици, оние кои ми го дебнат животот, кои ми сакаат несреќа, ми се закануваат со пропаст и секогаш смислуваат измама.

¹³А јас сум како глув и ништо не слушам и како нем, уста не отворам.

¹⁴Станав како човек што не слуша и кој нема одговор во устата.

¹⁵Зашто, о, Господи, на Тебе се надевам, Ти ќе ме услишиш, Господи, Боже мој!

¹⁶Зашто реков: „Нека не се радуваат над мене; кога ногата ќе ми се сопне, нека не се креваат над мене!”

¹⁷Зашто не пропаднав за малку, и мојата болка секогаш е пред мене.

¹⁸Јас ги признавам своите беззаконија, и полн сум со жалост заради својот грев.

¹⁹А кои се против мене, без причина силни се, и мнозина се што ме мразат неправедно.

²⁰За добро ми враќаат со зло, ми се противат дека го барам доброто.

²¹О Господи, не ме оставај! Боже мој, не оддалечувај се од мене!

²²Побрзај ми на помош, Господи, Спасителу мој!