Read Библија, Константинов Псалми 44 Bible Online

Псалми 44 - Библија, Константинов bible

Псалми 44

¹За началникот на пејачите. Учење за Кореевите синови. Боже, со своите уши слушавме, нашите татковци ни раскажуваа, за делото што го направи во нивните дни, во стари времиња.

²Со Својата рака ги протера многубошците, а нив ги посади, ги откорна народите, а нив ги рашири.

³Со нивниот меч тие не ја зазедоа земјата, ниту нивната мишка им донесе победа, туку Твојата десница и Твојата мишка, и светлоста на Твоето лице, зашто ги љубеше.

⁴Ти, о мој Царе и Боже мој, Ти му даде победа на Јакова.

⁵Преку Тебе ги одбивме нашите непријатели, во Твоето име ги згазивме оние, што се кренаа против нас.

⁶Не се надевав на својот лак, ниту мојот меч ме спасуваше.

⁷Туку, Ти, Ти нè избави од непријателите, Ти ги засрами оние што нè мразат.

⁸Се фалевме со Бога во секое доба и Твоето име го славевме секогаш.

⁹А сега нè отфрли и нè засрами, и повеќе не излегуваш, Боже со нашите чети.

¹⁰Ти остави да се повлечеме пред непријателите, и нè ограбија нашите мразители.

¹¹Нè даде како овци за колење, и нè растури меѓу народите.

¹²Го продаде Својот народ за ништо, и не се збогати со продажбата.

¹³Нè направи за срам меѓу нашите соседи, смеа и играчка за оние околу нас.

¹⁴Засрамени сме меѓу народите, народите кимнуваат со главата над нас.

¹⁵Мојата срамота секогаш ми е пред очите, и срамот ми го покрива лицето.

¹⁶Заради навредливата врева на подбивачите, заради осветољубивите непријатели.

¹⁷Сè тоа нè снајде иако не Те заборавивме, ниту го изневеривме Твојот Завет,

¹⁸ниту нашето срце се одметна од Тебе, ниту нашата нога се отстрани од Твојот пат,

¹⁹кога нè раздроби во престојувалиштето на шакалите и нè завитка со смртен мрак.

²⁰Ако го заборавиме името на нашиот Бог, ако ги кренавме рацете кон туѓ бог,

²¹зар Бог не би научил за тоа? Зашто Тој ги знае тајните на срцето!

²²Но заради Тебе нè убиваат ден по ден, и ние сме им како овци за колење.

²³Разбуди се! Зошто спиеш Господи? Стани! Не отфрлај нè довека!

²⁴Зошто го криеш Своето лице, ги забораваш нашата беда и неволја?

²⁵Зашто нашата душа се распадна во прав, утробата ни се долепи до земјата.

²⁶Стани, помогни ни, избави нè заради Твојата љубов.