Read Библија, Константинов Псалми 45 Bible Online

Псалми 45 - Библија, Константинов bible

Псалми 45

¹За началникот на пејачите. На Шошан. Поука за Кореевите синови. Љубовна песна. Прекрасни зборови извираат од моето срце: својата песна му ја пејам на царот, јазикот ми е како трска на брзописецот.

²Убав си, најкрасен меѓу човечките синови, милина ти се разлева по усните, заради тоа Бог нека те благослови довека.

³Препаши меч на своето бедро, јунаку, наметни се со сјај и величество!

⁴Јавни победнички во своето величие, заради вистината, кротоста и правдата, Твојата десница нека научува страшни нешта!

⁵Остри се Твоите стрели, народи паѓаат пред Тебе, и царските непријатели ги напушта храброста.

⁶Твојот престол, Боже, е до вечни векови, и праведен жезал - е жезал на Твоето Царство!

⁷Ти ја љубиш правдата, а го мразиш беззаконието, заради тоа, Господ, Твојот Бог, Тебе Те помаза со масло на радоста, како никого од Твоите другари.

⁸На смирна, алој и касија мирисаат твоите облеки, од дворците, од слонова коска, Те веселат псалтири.

⁹Царските ќерки се меѓу твоите почесни, оддесно ти е царицата во офирско злато.

¹⁰„Слушај ќерко, погледај, прислушни: заборави го својот народ и домот на татка си!

¹¹Ако ја посака царот твојата убавина, поклони му се скромно, зашто тој е твој господар.

¹²Тирската ќерка доаѓа со дар, народните првенци ја бараат твојата наклонетост.”

¹³Целата слава на царската ќерка е внатре, нејзините облеки се везени со злато.

¹⁴Ја доведуваат при царот во облека со шарен вез, придружба и се девици - нејзините другарки.

¹⁵Со веселба и радост ги доведуваат, влегуваат во царскиот дворец.

¹⁶Твоите синови ќе ги наследат твоите татковци, ќе ги поставиш за кнезови на целата земја.

¹⁷Од колено на колено ќе го навестуваат Твоето име, народите ќе Те фалат во вечни векови.