Read Библија, Константинов Псалми 56 Bible Online

Псалми 56 - Библија, Константинов bible

Псалми 56

¹За началникот на пејачите. За гулабица, што молчи во далечина. Давидово писмо, кога Филистејците го фатија во Гат. Смилувај ми се мој Боже, зашто човекот сака да ме проголта; мојот напаѓач непрекратно ме угнетува.

²Моите непријатели се нафрлаат врз мене секој ден; мнозина се оние, што војуваат против мене.

³Кога стравот ме опфаќа, на Тебе ќе се надевам.

⁴Во Бога јас ќе го фалам Неговото слово; јас се надевам на Бога и нема да се плашам, што може да ми направи смртник?

⁵Од утро до вечер, ми ги изопачуваат зборовите; сите нивни помисли се зло за мене.

⁶Се состануваат и дебнат; внимаваат на моите чекори; за да ја уловат мојата душа.

⁷Плати им според беззаконието, о Боже, со гнев обори ги незнабошците!

⁸Ти ги изброи дните на моите скитања, ги собра моите солзи во Твојот сад; не е ли запишано сè во Твојата книга?

⁹Моите непријатели ќе се повлечат, штом ќе Те повикам. Од ова знам дека Бог е за мене!

¹⁰Го славам Божјото слово, го славам Господовото слово.

¹¹Се надевам на Бога и нема да се плашам: што може да ми направи човек?

¹²Ме врзуваат заветите што Ти ги направив Тебе, о Боже, ќе Ти принесам благодарни жртви,

¹³зашто ми ја спаси душата од смрт. Ти ги запази моите нозе од паѓање за да одам пред Бога, во светлината на живите.