Read Библија, Константинов Псалми 57 Bible Online

Псалми 57 - Библија, Константинов bible

Псалми 57

¹За началникот на пејачите. Не погубувај. Давидово писмо кога тој избега од Саула во пештера. Помилувај ме, Боже, о помилувај ме, зашто мојата душа се надева на Тебе. Се засолнувам под сенката на Твоите крилја, додека не мине гибелта.

²Викам кон Сèвишниот Бог, кон Бога кој ми исполни сè.

³Нека испрати од небесата и нека ме спаси, нека ги засрами оние, што ме гонат: нека ја испрати Бог Својата милост и вистина.

⁴Лежам среде лавовите, што ги голтаат човечките синови. Забите им се копја и стрели, а јазикот им е наострен меч.

⁵Возвиши се, Боже, над небесата, Твојата слава нека е над целата земја!

⁶Наместија мрежи за моите стапки, ја стиснаа мојата душа; ископаа јама пред мене, и сами паднаа во неа.

⁷Постојано е моето срце Боже, постојано е моето срце, ќе пеам и ќе свирам.

⁸Разбуди се, душо моја! Разбуди се псалтир и гусле! Ќе ги разбудам утринските мугри.

⁹Ќе Те фалам Господи, меѓу народите, ќе Ти пеам меѓу племињата.

¹⁰Зашто Твојата милост е до небото, Твојата верност е до облаците.

¹¹Возвиши се, Боже, над небесата, Твојата слава нека е над целата земја!