Read Библија, Константинов Псалми 59 Bible Online

Псалми 59 - Библија, Константинов bible

Псалми 59

¹За началникот на пејачите. Не погубувај! Давидово пишување, кога Саул испрати да го погубат во куќата. Избави ме од непријателите, Боже мој, заштити ме од моите противници!

²Избави ме од беззакониците, спаси ме од крволоците!

³Зашто ете; ја дебнат мојата душа, силниците станаа против мене. Нема вина на мене, о Господи ни грев:

⁴Без моја вина се нафрлаат врз мене. Разбуди се! Дојди ми на помош и погледај,

⁵Господи, Боже над Воинствата, Израелев Боже! Подигни се, казни ги сите многубошци, немој да им се смилуваш на подлеците!

⁶Навечер се враќаат, вијат како кучиња и трчаат по градот.

⁷Гледај, како блуваат со устите; клеветите им се на устите и велат: „Кој нè слуша?”

⁸Но, Ти им се смееш, о Господи, и им се ругаш на сите незнабошци.

⁹О Сило моја, ќе се надевам на Тебе, зашто Ти си Боже, моја заштита,

¹⁰мој Бог, Кој ме милува, ќе ме одбрани; Бог ќе ми даде да ги видам моите непријатели.

¹¹Не погубувај ги, за да не ми го заведуваат народот, распрсни ги со Твојата сила, симни ги Господи, заштитнику наш.

¹²Грев е секој збор на нивните усти, нека се фатат во својата гордост, во клеветите и лагите, што ги зборуваат!

¹³Истреби ги во гнев, истреби ги за да исчезнат, нека се знае дека Господ владее во Јакова и до крајот на земјата.

¹⁴Навечер се враќаат и вијат како кучиња и трчаат по градот.

¹⁵Нека скитаат наоколу барајќи храна; и кога нема да се наситат, тогаш ‘ржаат.

¹⁶А јас ќе ја опејам Твојата сила и наутро ќе ја прославувам Твојата милост, зашто Ти ми стана засолниште и прибежиште во ден на неволја.

¹⁷О моја Сило, со песна ќе Те славам, зашто Ти си Боже, моја заштита, мој Бог, Кој ме милува.