Read Библија, Константинов Псалми 60 Bible Online

Псалми 60 - Библија, Константинов bible

Псалми 60

¹За началникот на пејачите. На Шушан-Едут. Давидово писмо за поучување, кога тој војуваше со Месопотамска Сирија и со Совската Сирија, и кога Јоав, враќајќи се порази дванаесет илјади Идумејци во Солената Долина. Боже, Ти нè отфрли и ни ги проби бојните редови, Ти се разгневи, а сега врати нè пак!

²Ја потресе земјата, ја распука, затвори и ги проломите, зашто таа се разнишала.

³Му навали зла коб на Твојот народ, нè напи со вино што омајува.

⁴Им даде знаме на оние кои се бојат од Тебе, за да избегаат пред непријателскиот лак.

⁵За да се избават Твоите возљубени, помогни со Твојата десница, послушај ме.

⁶Бог рече во Своето Светилиште: „Ќе го поделам Сихем со радосни извици, ќе ја измерам долината Сокхот.

⁷Мој е Галад, Мој е Манасиј, Ефрем Ми е кацига, - Јуда Мој жезал.

⁸Моав е сад од кого се мијам, врз Едом ќе ги фрлам Моите обувки, ќе славам победа над Филистејците!”

⁹Кој ќе ме доведе до утврдениот град? Кој ќе ме доведе до Едом?

¹⁰Зар не Ти, Боже, што нè отфрли? Зар повеќе Боже, не ќе излегуваш со нашите чети?

¹¹Помогни ни против противниците, зашто човечката помош е ништожна.

¹²Со Божја помош ќе се бориме храбро, а Тој ќе ги згази нашите непријатели.